ბოლო დროს, პრეზიდენტის განცხადებები გამოირჩევა ისეთი ნარატივების განვითარების მცდელობით, რომელიც, ვფიქრობ, გადახრილია ოპოზიციის მხარეს - ამის შესახებ ქართული ოცნების დეპუტატი, მიხეილ სარჯველაძემ განაცხადა.
"პრეზიდენტის ბოლოდროინდელი განცხადებები ისეთ შთაბეჭდილებას ტოვებს, რომ ალბათ, ყველა ვისურვებდით, მისი პოზიცია ცოტა უფრო დაბალანსებული იყოს და შესაბამისად, უფრო მეტად აქცენტირებული რეალურად არსებულ პრობლემებზე, ვიდრე გარკვეულ ტენდენციებზე აყოლის მცდელობები ვიხილოთ. ალბათ, ეს განსაკუთრებულად მნიშვნელოვანია. ბოლო დროს, პრეზიდენტის განცხადებები გამოირჩევა ისეთი ნარატივების განვითარების მცდელობით, რომელიც, ვფიქრობ, გადახრილია ოპოზიციის მხარეს". - თქვა სარჯველაძემ.
სალომე ზურაბიშვილი საგანგებო ბრიფინგზე გამოეხმაურა ტელეკომპანია POSTV-ის ხელმძღვანელის, შალვა რამიშვილის მხრიდან ქალების სექსუალური შევიწროების ფაქტების შესახებ გავრცელებულ ინფორმაციას.
პრეზიდენტმა ასევე გააკრიტიკა ხელისუფლება და თქვა, რომ ისინი ძალადობისგან გამიჯვნის ნაცვლად, მოძალადეს აგულიანებენ.
"ჩვენი ისტორიისა და რეპუტაციის შელახვას თან ახლავს პოლიტიკური ზიანიც. იმ დროს, როცა ხელისუფლება თავს აწონებს სწორედ 12 რეკომენდაციიდან იმ ნაწილების შესრულებით, რომელიც ეხება ქალთა უფლებებს და გენდერს, გამოდის, რომ ერთი ხელით ვაუქმებთ მეორეთი ქაღალდზე დატანილს. მეტიც, ხელისუფლება ძალადობას კი არ ემიჯნება, თუნდაც სიტყვიერად, პირიქით, მოძალადეს აგულიანებს და მსხვერპლზე ამით განმეორებით ძალადობს, ეს ჩვენს ქვეყანას არ ეკადრება. უნდა გრცხვენოდეთ". – თქვა ზურაბიშვილმა.
