რუსეთში, ტულის ოლქის ეფრემოვის სასამართლომ ერთ დღეში განიხილა ადგილობრივი მცხოვრების ალექსეი მოსკალევის სისხლის სამართლის საქმე. ამის შესახებ რუსული, „უცხოეთის აგენტად“ აღიარებული ინტერნეტ-გამოცემა „მედიაზონა“ იუწყება.
მოსკალევის საქმის შესახებ ცნობილი გახდა 2022 წლის დეკემბერში. მისმა ქალიშვილმა ხელოვნების გაკვეთილზე დახატა ომის საწინააღმდეგო შინაარსის ნახატი, რის შემდეგაც სკოლის ადმინისტრაციამ პოლიცია გამოიძახა.
შედეგად მოზარდი რამდენჯერმე დაკითხეს. მოსკალევის სახლში ჩხრეკა ჩატარდა.
მარტოხელა მამის წინააღმდეგ საქმე აღიძრა „არმიის დისკრიმინაციის“ ბრალდებით. სასამართლომ მამა დააპატიმრა, მისი ქალიშვილი კი თავშესაფარში გაგზავნა.
სასამართლო სხდომაზე პროკურორმა მოსკალევისთვის ორწლიანი პატიმრობა მოითხოვა.
„თუ ახლა მკითხავთ აზრს, როგორი დამოკიდებულება მაქვს უკრაინაში „სპეცოპერაციის“ მიმართ, ვფიქრობ, რომ დარბაზში მყოფი ადამიანების 90 პროცენტი იტყვის, რომ ამის წინააღმდეგნი არიან და მე დავეთანხმები მათ. როგორი დამოკიდებულება შეიძლება გვქონდეს ადამიანების დაღუპვის მიმართ? უარყოფითი“, - თქვა მოსკალევმა თავის ბოლო სიტყვაში.
მოსკალევის განაჩენი 28 მარტს გამოცხადდება.