დღეს, “ერთიანი ნაციონალური მოძრაობის” ახალგაზრდული ყრილობა გაიმართა, სადაც ახალგაზრდული ორგანიზაციის წესდება დაფუძნდა, პარტიის თავმჯდომარემ, ლევან ხაბეიშვილმა ახალგაზრდული ორგანიზაციის მდივანი იგორ ნარმანია წარადგინა.
“წინა თაობებმა მოახერხეს საქართველოსთვის დამოუკიდებლობის მოპოვება, ხოლო ჩვენი თაობის მიზანია საქართველოსთვის თავისუფლებისა და განვითარების მოპოვება. ამ იდეების მიღწევა საქართველოს ცივილიზებულ სამყაროში, ევროპაში, ინტეგრაციის გარეშე წარმოუდგენელია”.- განაცხადა “ერთიანი ნაციონალური მოძრაობის”, ახალგაზრდული ორგანიზაციის მდივანმა.
სიტყვით გამოსვლის დროს, იგორ ნარმანიამ ისაუბრა ბევრ საკითხზე, როგორიც არის პრეზიდენტ მიხეილ სააკაშვილის ჯანმრთელობის მდგომარეობა, ნიკა გვარამიას პატიმრობა, დეოლგარქიზაცია და ბევრ მნიშვნელოვან საკითხზე. ასევე მან სიტყვით გამოსვლის დროს, ისაუბრა “ერთიანი ნაციონალური მოძრაობის” ახალგაზრდული ორგანიზაციის სტრუქტურაზე; “მე როგორც ახალგაზრდული მდივანი პასუხისმგებლობას ვიღებ ახალგაზრდული ორგანიზაციის წესდებით გათვალისწინებული ყველა სტრუქტურის ჩამოყალიბების, ინფრასტრუქტურის გამართვისა და ახალი ენერგიული ადამიანების მოზიდვის საკითხებზე. ეს უნდა იყოს პლატფორმა ყველა ახალგაზრდისთვის, რომლისთვისაც მნიშვნელოვანია რა იქნება ხვალ! ამასთანავე ბორდთან ერთად ერთი წლის განმავლობაში ჩავატარებთ “ერთიანი ნაციონალური მოძრაობის ახალგაზრდული ორგანიზაციის თავმჯდომარის არჩევნებს, რომლითაც გავაგრძელებთ “ნაციონალური მოძრაობის” ტრადიციას - იყოს ინოვატორი ქართულ პოლიტიკაში. ჩვენი ორგანიზაციის თავმჯდომარე აირჩევა ღია გამჭვირვალე ელექტრონული პლატფორმით, სადაც თითოეულ კანდიდატს მიეცემა კამპანიის ჩატარების თანაბარი შესაძლებლობები, იქამდე კი პირობას გაძლევთ, რომ ეს იქნება ყველაზე მასშტაბური ახალგაზრდული მოძრაობა საქართველოს ევროპული მომავლისთვის! მიშას თავისუფლებისთვის! საქართველოში რუსული მმართველობის საბოლოოდ დასამარებისთვის”! - განაცხადა იგორ ნარმანიამ.