პოლიტიკური ჯგუფის „ლელო - პარტნიორობა საქართველოსთვის“ თავმჯდომარემ, დავით უსუფაშვილმა, პარლამენტში პრემიერ-მინისტრის გამოსვლის შემდეგ, არჩევნების გზით დღეს მოქმედი ხელისუფლების ცვლილებების შესახებ ისაუბრა და აღნიშნა, რომ დღევანდელ პრემიერ-მინისტრს მოუწევს იმის შეგუება, რომ არჩევნების შემდეგ ის პრემიერ-მინისტრი აღარ იქნება.
„მინდა ბატონი პრემიერ-მინისტრი ცოტათი დავამშვიდო - საქართველოში არანაირი რეჟიმის ცვლილება არ იქნება რაიმე დემონსტრაციის ფონზე, მაგრამ მინდა ავაღელვო კიდეც ცოტათი, რომ რეჟიმის ცვლილება აუცილებლად იქნება, ოღონდ ეს იქნება არჩევნების შემდეგ, 2024 წელს. კი, ასე იქნება, ირაკლი აღარ იქნება პრემიერი და ამასთან მოუწევს შეგუება. და არც ვანო მერაბიშვილი არასოდეს აღარ იქნება პრემიერი და მასაც მოუწევს ამასთან შეგუება. „ლელოს“ და ქართული ოპოზიციის უდიდესი ნაწილის პოლიტიკური პოზიცია ეს არის და დარწმუნებული ვარ, საქართველოს მოსახლეობის უდიდესი ნაწილის პოლიტიკური ხედვა ესაა, რომ ძალიან მალე, არჩევნების გზით უნდა დასრულდეს ის ორი ეპოქა, რომელმაც ჯამში ჯერ ერთმა, მერე მეორემ და მერე ერთმანეთთან კინკლაობაში ამ ქვეყანას უდიდესი ზარალი და ზიანი მიაყენეს. ამისი ნათელი დადასტურებაა დღევანდელი დღეც, როდესაც ნაცვლად იმისა, რომ მართლა ეროვნული ინტერესების თემაზე გველაპარაკა, ეროვნული უსაფრთხოების საკითხებზე ანუ იმ თემებზე, სადაც ქვეყანა ერთიანი უნდა იყოს, რომ გაუმკლავდეს სხვადასხვა საფრთხეს, ამის ნაცვლად პრემიერ-მინისტრმა მარჯვედ გამოიყენა მისთვის მიცემული დრო და ილაპარაკა ისევ იმაზე, რაზეც სულ ვლაპარაკობთ. ეს დასრულდება! რეჟიმი შეიცვლება უკეთესი რეჟიმით“, - განაცხადა დავით უსუფაშვილმა.
