გარემოს დაცვისა და სოფლის მეურნეობის სამინისტროს გარემოს ეროვნული სააგენტოს ხელმძღვანელმა ჰიდრომეტეოროლოგიის დეპარტამენტის სპეციალისტებს პროფესიული დღე მიულოცა.
სააგენტოში გამართულ შეხვედრაზე, ჰიდრომეტეოროლოგიის დეპარტამენტის უფროსმა მიმდინარე პროექტებსა და სამომავლო გეგმებზე ისაუბრა.
აღსანიშნავია, რომ, ბოლო წლებში, საქართველოს მასშტაბით, ჰიდრომეტეოროლოგიური სადამკვირვებლო ქსელის გაფართოების მიზნით, მნიშვნელოვანი სამუშაოები განხორციელდა, რაც მეტეოროლოგიური პროგნოზის გაუმჯობესებას და ქვეყნის ტერიტორიაზე ჰიდრომეტეოროლოგიური რეჟიმის უფრო სრულყოფილად შეფასებას უწყობს ხელს. ამ ეტაპზე, მონიტორინგი 107 მეტეოროლოგიური და 85 ჰიდროლოგიური დაკვირვების პუნქტზე მიმდინარეობს. მიმდინარე წლის ბოლომდე, დამატებით დამონტაჟდება 72 ერთეული ავტომატური ჰიდრომეტეოროლოგიური სადგური.
2023 წელს, მეტეოროლოგიის მსოფლიო დღის თემაა „ამინდის, კლიმატის და წყლის მომავალი ახალგაზრდების ხელშია“, რაც ხაზს უსვამს მომავალი თაობების როლს გარემოსდაცვითი ქმედებების განხორციელებაში.
მეტეოროლოგიის მსოფლიო დღის აღნიშვნის ფარგლებში, გარემოსდაცვითი ინფორმაციისა და განათლების ცენტრის ორგანიზებით, სკოლის მოსწავლეებმა გარემოს ეროვნული სააგენტოს მეტეოროლოგიური რადარი დაათვალიერეს.
მოსწავლეებმა, დარგის სპეციალისტებთან ერთად, შესაძლო სტიქიურ მოვლენებზე საპროგნოზო ინფორმაციისა და გაფრთხილებების შესაბამისი უწყებებისთვის დროული მიწოდების მნიშვნელობის საკითხები განიხილეს, მიიღეს ინფორმაცია ქვეყანაში არსებული მეტეოროლოგიური რადარების მონაცემების ანალიზის და დამახასიათებელი გეოლოგიური საფრთხეების შესახებ.
მეტეოროლოგიის მსოფლიო დღის დაარსება 1950 წლის 23 მარტს, მსოფლიო მეტეოროლოგიური ორგანიზაციის კონვენციის ძალაში შესვლას უკავშირდება, რის საფუძველზეც გაეროს მსოფლიო მეტეოროლოგიური ორგანიზაცია (WMO) შეიქმნა. საქართველო 1992 წლიდან მსოფლიო მეტეოროლოგიურ ორგანიზაციას წევრია და ქვეყანაში მეტეოროლოგიის მსოფლიო დღეც ამ დროიდან, ყოველწლიურად აღინიშნება.
