რუსეთი ყოველ დარტყმაზე მიიღებს როგორც სამხედრო, ისე პოლიტიკურ და იურიდიულ პასუხს. ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვაში, ხარკოვისა და დონეცკის ოლქების მონახულების შემდეგ განაცხადა.
ზელენსკიმ აღნიშნა, რომ მისთვის პატივია მხარი დაუჭიროს სამხედროებს, რომლებიც ქვეყანას უმძიმეს პირობებში იცავენ.
„ჩემთვის პატივია მხარდაჭერა გამოვუცხადო ჩვენს სამხედროებს, რომლებიც იცავენ სახელმწიფოს ფრონტის ხაზის ყველაზე სასტიკ პირობებში. გადავეცი მათ სახელმწიფო ჯილდოები, მადლობა გადავუხადე ჩვენს მეომრებს სიმამაცისთვის, სიმტკიცისთვის, უკრაინისთვის, რომელზეც ვზრუნათ სწორედ ამ გმირების წყალობით, თითოეული მათგანის წყალობით, ვინც იბრძვის რუსული ბოროტების წინააღმდეგ“, - თქვა ზელენსკიმ.
მისი თქმით, მტკივნეულია დონბასის ქალაქების ხილვა, რომლებსაც რუსეთმა მოუტანა საშინელი ტანჯვა და ნგრევა.
„თითქმის მუდმივი, ყოველსაათობრივი საჰაერო განგაშის ხმა კრამატორსკში, დაბომბვის მუდმივი საფრთხე, სიცოცხლისთვის მუდმივი საფრთხე... სწორ იქ, დონბასში, ხარკოვის ოლქში - ყველგან, სადაც მივიდა რუსული ბოროტება, აშკარაა, რომ ტერორისტი სახელმწიფოს შეჩერება შესაძლებელია მხოლოდ ჩვენი გამარჯვებით და ჩვენ ამას მივაღწევთ“, - განაცხადა უკრაინის პრეზიდენტმა.
მან აღნიშნა, რომ ყველაფერს გააკეთებენ, რომ ლურჯ-ყვითელმა დროშამ გააგრძელოს გამათავისუფლებელი ბრძოლა, რათა დაბრუნდეს მშვიდობიანი ცხოვრება უკრაინის მთელს ტერიტორიაზე.
„ჩვენ აუცილებლად გავცემთ პასუხს ოკუპანტებს ყოველი დარტყმისთვის ჩვენ ქალაქებზე... რუსეთის დღევანდელი დარტყმები ზაპოროჟიეზე, ღამის შეტევა კიევის ოლქზე... რუსეთის ყველა ეს დარტყმა მიიღებს როგორც სამხედრო, ისე პოლიტიკურ და იურიდიულ პასუხს. რუსეთი წააგებს ამ ომს, - განაცხადა ზელენსკიმ.
უკრაინის პრეზიდენტი დღეს დონეცკის ოლქში, ბახმუტთან უკრაინელი სამხედროების პოზიციებზე, შემდეგ კი ხარკოვის ოლქში იმყოფებდა.ზელენსკიმ უკრაინის დამცველებს სახელმწიფო ჯილდოები გადასცა.
