ნატო-ს გენერალური მდივნის იენს სტოლტენბერგის განცხადებით, არსებობს ნიშნები იმისა, რომ რუსეთმა ჩინეთს ლეტალური იარაღის მიწოდება სთხოვა უკრაინაში საბრძოლო მოქმედებების საწარმოებლად.
„ჩვენ არ გვინახვს მტკიცებულება, რომ ჩინეთი რუსეთს ლეტალურ იარაღს აწვიდს, მაგრამ ჩვენ ვნახეთ ნიშნები იმისა, რომ ასეთი თხოვნა რუსეთის მხრიდან გაჟღერდა და რომ ამ საკითხს პეკინში ჩინეთის ხელისუფლება განიხილავს“, - აღნიშნა სტოლტენბერგმა.
მან გააფრთხილა ჩინეთი, არ მიაწოდოს რუსეთს ლეტალური დახმარება, რაც უკანონო ომის მხარდაჭერა იქნება.
სტოლტენბერგის აზრით, რუსეთში ჩინეთის ლიდერის სი ძინპინის ვიზიტი და ვლადიმირ პუტინთან შეხვედრა ადასტურებს პეკინისა და მოსკოვის დაახლოებას, რაც ბოლო წლების განმავლობაში ხდებოდა.
„ჩვენ ვხედავთ, ჩინეთი და რუსეთი სულ უფრო როგორ უახლოვდებიან ერთმანეთს სამხედრო სფეროში - ერთობლივი წვრთნები, ერთობლივი პატრულირება ზღვაში, ჰაერში. ეკონომიკური მიმართულებით, ასევე პოლიტიკურ და დიპლომატიურ სფეროებში. მოსკოვში შეხვედრა წარმოადგენს ამ ტენდენციის ნაწილს. ჩინეთი და რუსეთი უფრო და უფრო მჭიდროდ მუშაობენ და აშენებენ სულ უფრო მყარ და ძლიერ პარტნიორობას“, - განაცხადა სტოლტენბერგმა.
