„ქართულ ოცნებას“ ვურჩევდი ცეცხლთან თამაშს თავი დაანებონ და დაივიწყონ ამ კანონპროექტზე ფიქრი“, - ამის შესახებ განაცხადა „ერთიანი ნაციონალური მოძრაობის“ პოლიტსაბჭოს თავმჯდომარემ, ლევან ბეჟაშვილმა.
დღეს, „ქართული ოცნების“ თავმჯდომარემ, ირაკლი კობახიძემ განაცხადა, რომ „აგენტების კანონს“ იღებენ მთელი მსოფლიოს მასშტაბით და აღნიშნა, რომ მთელი კამპანია, რომელიც წამოიწყო ოპოზიციამ, იყო ფარსი.
ლევან ბეჟაშვილი „ქართულ ოცნებას“ მოუწოდებს, რომ კარგად გაეცნონ სხვა ქვეყნებში ანალოგიურ კანონპროექტს, რომელიც ეხება მტრულ სახელმწიფოებს და ავტორიტარულ რეჟიმებს. ქართულ რეალობაში კი მათ მიერ ინიცირებული კანონპროექტი არის შინაარსით რუსული კანონი,
„სამწუხაროა, რომ პრემიერ მინისტრს და „ქართულ ოცნებას“ ვერ გამოაქვს შინაარსი კონკრეტული საკითხებიდან მაშინ, როდესაც ევროპარლამენტში, ამერიკის შეერთებულ შტატებში, კანადაში მოქმედი ანალოგიური კანონმდებლობა ეხება მტრულ სახელმწიფოებს და ავტორიტარულ რეჟიმებს. მათ ვერ განუსხვავებიათ, რომ ქართულ სინამდვილეში მათ მიერ ინიცირებული კანონპროექტი არის შინაარსით რუსული კანონი, რადგან ეწინააღმდეგებოდა ევროპულ და დასავლურ ღირებულებებს. სწორედ ამიტომ გამოვიდა ხალხი ქუჩაში, ამიტომ გააპროტესტა და „ქართულ ოცნებას“ ვურჩევდი ცეცხლთან თამაშს თავი დაანებონ და დაივიწყონ ამ კანონპროექტზე ფიქრი.“ - განაცხადა ლევან ბეჟაშვილმა.