საფრანგეთის პარლამენტში უნდობლობის გამოცხადების ჩავარდნის შემდეგ, პარიზსა და სხვა ქალაქებში საპროტესტო გამოსვლები დაიწყო.
პარიზის ცენტრში პროტესტნტებმა დაწვეს ნაგვის ურნები, პოლიციასა და მომიტინგეებს შორის შეტაკება მოხდა. სამართალდამცველებსა და დემონსტრანტებს შორის შეტაკებები იყო ქალაქ ლილშიც. პოლიციამ ცრემლსადენი გაზი გამოიყენა. დემონსტრაცია გაიმართა ბორდოშიც. პოლიციამ რამდენიმე ადამიანი დააკავა.
უნდობლობის გამოცხადების შესახებ კენჭისყრა საფრანგეთის პარლამენტში მას შემდეგ ჩაინიშნა, რაც პრეზიდენტმა ემანუელ მაკრონმა პარლამენტის ქვედა პალატის გვერდის ავლით დაამტკიცა საპენსიო სისტემის ცვლილების სადავო კანონი.
რეფორმა საპენსიო ასაკის 62-დან 64 წლამდე გაზრდას ითვალისწინებს. აღნიშნულმა ინიციატივამ საფრანგეთში მასობრივი გაფიცვები და საპროტესტო გამოსვლები გამოიწვია.
სამი პარტიის მიერ ინიცირებული კენჭისყრის დროს მთავრობისთვის უნდობლობის გამოცხადებას 278-მა დეპუტატმა მისცა ხმა. ოპოზიციას მხოლოდ ცხრა ხმა დააკლდა მთავრობისთვის უნდობლობის გამოსაცხადებლად.
პროფკავშირებმა საპენსიო რეფორმის წინააღმდეგ საყოველთაო გაფიცვის გამოცხადება ხუთშაბათს დაგეგმეს.
