პარლამენტის პირველი ვიცე-სპიკერის გია ვოლსკის განცხადებით, უმრავლესობის გუშინდელ შეხვედრაზე განათლების მინისტრთან დაკავშირებით იყო საუბარი.
ვოლსკის კომენტარს პირველი არხი ავრცელებს.
მისი თქმით, საკადრო გადაწყვეტილების შემთხვევაში, ამასთან დაკავშირებით განცხადებას პრემიერ-მინისტრი გააკეთებს.
„გუშინდელ შეხვედრაზე განათლების მინისტრთან დაკავშირებით იყო საუბარი, შესაძლო საკადრო გადაწყვეტილების თემასთან დაკავშირებით. გავცვალეთ გარკვეული აზრები ამ საკითხთან, ზოგადად საგანმანათლებლო სისტემასთან დაკავშირებით. საკმაოდ საინტერესო მოსაზრებებიც მოვისმინეთ. საკადრო გადაწყვეტილებების თემა საბოლოოდ თუ იქნება დადასტურებული, ამის თაობაზე განცხადებას გააკეთებს ის ადამიანი, ვინც იღებს ამ გადაწყვეტილებას, კერძოდ, პრემიერ-მინისტრი“, - თქვა ვოლსკიმ.