გერმანიის იუსტიციის მინისტრმა მარკო ბუშმანმა განაცხადა, რომ თუ რუსეთის პრეზიდენტი ვლადიმირ პუტინი გერმანიაში ჩავა, მას დააკავებენ.
ამის შესახებ იუწყება გამოცემა Zeit.
„გერმანია ვალდებული იქნება დააპატიმროს პრეზიდენტი პუტინი, თუ ის გერმანიის ტერიტორიაზე შემოვა და მას სისხლის სამართლის საერთაშორისო სასამართლოს გადასცემს“, - განაცხადა იუსტიციის მინისტრმა.
მანამდე, გერმანიის კანცლერი ოლაფ შოლცი მიესალმა სისხლის სამართლის საერთაშორისო სასამართლოს გადაწყვეტილებას პუტინის დაკავების ორდერის გაცემასთან დაკავშირებით, მისი თქმით, ორდერი ადასტურებს, რომ კანონის მაღლა არავინ დგას.
სისხლის სამართლის საერთაშორისო სასამართლოს მოსამართლეების გადაწყვეტილებით, რუსეთის პრეზიდენტი უკრაინაში ომის დანაშაულების ჩადენაშია ეჭვმიტანილი.
როგორც სასამართლოს განცხადებაშია ნათქვამი, რუსეთის პრეზიდენტი, „სავარაუდოდ, არის პასუხისმგებელი ომის დანაშაულზე, მოსახლეობის (ბავშვების) უკანონო დეპორტაციაზე და მოსახლეობის (ბავშვების) უკანონო გადაყვანაზე უკრაინის ოკუპირებული ტერიტორიებიდან რუსეთის ფედერაციაში“.
სასამართლომ, ასევე ბავშვთა უფლებების საკითხებში რუსეთის კომისრის, მარია ალექსეევნა ლვოვა-ბელოვას დაპატიმრების ორდერი გასცა.