სულ მცირე 522 ადამიანი ემსხვერპლა აფრიკის სამ ქვეყანაში - მადაგასკარში, მოზამბიკსა და მალავიში ტროპიკულ შტორმ „ფრედის“. ასობით ათასი ადამიანი დაზარალდა გადაუღებელი წვიმების, წყალდიდობისა და მეწყერის შედეგად. ინფორმაციას სააგენტო dpa ავრცელებს.
18 მარტის მონაცემებით, ყველაზე მეტი ადამიანი დაიღუპა მალავიში, რომელიც ამ სამ ქვეყანას შორის ყველაზე პატარა და მსოფლიოში ერთ-ერთი ყველაზე ღარიბი სახელმწიფოა. ქვეყნის ხელისუფლება 438 დაღუპულის შესახებ იტყობინება. კიდევ 345 ათასამდე ადამიანი დაზარალდა გადაუღებელი წვიმების, წყალდიდობისა და მეწყერის შედეგად, რომელიც „ფრედის“ მოყვა. ათობით ათასი მცხოვრები კი უსახლკაროდ დარჩა. ქვეყნის სამხრეთ ნაწილში საგანგებო რეჟიმი გამოცხადდა.
მოზამბიკში ქვეყნის პრეზიდენტის, ფელიპე ნიუსის თქმით, შტორმმა სულ მცირე 67 ადამიანი იმსხვერპლა. მადაგასკარის მთავრობა კი 17 დაღუპულის შესახებ იუწყება.
ინდოეთის ოკეანეზე წარმოქმნილი ტროპიკული შტორმი 21 თებერვალს ჯერ მადაგასკარს დაატყდა თავს, შემდეგ გადაინაცვლა კონტინენტზე, რის შემდეგაც ისევ კუნძულზე დაბრუნდა და 11 მარტს მოზამბიკსა და მალავის გადაუარა. ამგვარად, ის უკვე ერთ თვეზე მეტია რაც მძვინვარებს. მსოფლიო მეტეოროლოგიური ორგანიზაციის ცნობით, სავარაუდოდ, ის ყველაზე ხანგრძლივი შტორმი იქნება ბოლო პერიოდის განმავლობაში. ციკლონი მას ჯერ კიდევ 6 თებერვალს ეწოდა.
ციკლონების სეზონი სამხრეთ აფრიკაში იანვარში იწყება და მარტსა და აპრილში მთავრდება.