მოლდოვის პრეზიდენტი მაია სანდუ აცხადებს, რომ სისხლის სამართლის საერთაშორისო სასამართლოს მიერ რუსეთის პრეზიდენტის ვლადიმირ პუტინის დაკავების ორდერის გაცემა “ადასტურებს მის პირად ბრალეულობას უკრაინის ტერიტორიაზე ჩადენილ ომის დანაშაულებში. სანდუმ ამის შესახებ მოლდოვის საზოგადოებრივი მაუწყებლის ეთერში ისაუბრა.
„მოლდოველები არასდროს ყოფილან მკვლელების მხარეს. ჩვენ დავგმეთ რუსეთის აგრესია უკრაინის წინააღმდეგ ომის დაწყების პირველივე დღიდან“, - განაცხადა სანდუმ.
მისი თქმით, რუსეთი ცდილობს მოლდოვის შიდა საქმეებში ჩარევას.
„ჩვენ მტკიცედ ვამბობდით, რომ რუსეთს სურს მოლოდვის კონსტიტუციური წყობის დამხობა, მე ვიცოდი, რომ რუსეთი ცდილობს მოლდოვის შიდა საქმეებში ჩარევას, მე ვიცოდი პროპაგანდაზე, და როდესაც მქონდა უდავო მტკიცებულებები კიშინიოვის ხელისუფლების დამხობის, გამოვედი საჯაროდ, რათა ხალხს სცოდნოდა, ვინ არიან ჩვენი მეგობრები და ვინ მტრები“, - განაცხადა სანდუმ.
ამასთან, მოლდოვის პრეზიდენტმა აღნიშნა, რომ რუსეთი მოლდოვის საზღვრებიდან შორს არის, უკრაინელების, მათი სიმამაცისა და თავისუფლებისადმი სიყვარულის წყალობით.
„ვინაიდან, რუსეთის ფედერაციას არ შეუძლია მოვიდეს ჩვენ საზღვრებთან, ის ეწევა ჰიბრიდულ ომს“, - აღნიშნა სანდუმ.