გერმანიის კანცლერი ოლაფ შოლცი მიესალმება სისხლის სამართლის საერთაშორისო სასამართლოს მიერ რუსეთის პრეზიდენტის ვლადიმირ პუტინის დაკავების ორდერის გაცემას.
„კანონზე მაღლა არავინ დგას, ეს საერთაშორისო სამართლისთვის ძალიან მნიშვნელოვანი პრინციპია“, - განაცხადა შოლცმა ტოკიოში ვიზიტის დროს.
მანამდე აშშ-ის პრეზიდენტმა ჯო ბაიდენმა პუტინის დაკავების ორდერის გაცემას გამართლებული უწოდა. „პუტინმა აშკარად ჩაიდინა ომის დანაშაულები“, - თქვა ბაიდენმა.
სისხლის სამართლის საერთაშორისო სასამართლოს მოსამართლეების გადაწყვეტილებით, რუსეთის პრეზიდენტი უკრაინაში ომის დანაშაულების ჩადენაშია ეჭვმიტანილი.
როგორც სასამართლოს განცხადებაშია ნათქვამი, რუსეთის პრეზიდენტი, „სავარაუდოდ, არის პასუხისმგებელი ომის დანაშაულზე, მოსახლეობის (ბავშვების) უკანონო დეპორტაციაზე და მოსახლეობის (ბავშვების) უკანონო გადაყვანაზე უკრაინის ოკუპირებული ტერიტორიებიდან რუსეთის ფედერაციაში“.
სასამართლომ, ასევე ბავშვთა უფლებების საკითხებში რუსეთის კომისრის, მარია ალექსეევნა ლვოვა-ბელოვას დაპატიმრების ორდერი გასცა.
