"გაერთიანებული სამეფოს საგარეო, თანამეგობრობის და განვითარების საქმეთა სახელმწიფო მდივნის საქართველოში ვიზიტი განსაკუთრებულ დატვირთვას იძენს რეგიონში არსებული გამოწვევების გათვალისწინებით და მხარდაჭერის მნიშვნელოვანი გამოხატულებაა, რაც კიდევ ერთხელ ადასტურებს ჩვენს ქვეყნებს შორის არსებულ სტრატეგიულ პარტნიორობას და თვალნათლივ წარმოაჩენს ბრიტანეთის მზარდ ჩართულობას ჩვენს რეგიონში", - ამის შესახებ საგარეო საქმეთა მინისტრმა, ილია დარჩიაშვილმა ბრიტანელ კოლეგასთან შეხვედრის შემდეგ გამართულ პრესკონფერენციაზე განაცხადა.

როგორც ილია დარჩიაშვილმა აღნიშნა, დიდი ბრიტანეთის სახელმწიფო მდივანთან შეხვედრაზე, განხილული იქნა ორმხრივი ურთიერთობების ფართო სპექტრი და სტრატეგიული თანამშრომლობა, რაც ორ ქვეყანას შორის არსებულ ისტორიულ კავშირებზეა დაფუძნებული.

“ფასდაუდებელია გაერთიანებული სამეფოს როლი საქართველოს ტერიტორიული მთლიანობის, სუვერენიტეტის მხარდაჭერის და არაღიარების პოლიტიკის კონსოლიდაციის მიმართულებით.“- აღნიშნა მინისტრმა. მან ხაზი გაუსვა ბრიტანეთის ძალისხმევას საქართველოს დემოკრატიული ტრანსფორმაციის და რეფორმების დღის წესრიგის განხორციელების პროცესში, ისევე როგორც ჰიბრიდული საფრთხეების ეპოქაში, ლონდონის მხარდაჭერას კიბერუსაფრთხოების სფეროში ქვეყნის მედეგობის გაძლიერების კუთხით.

მინისტრის თქმით, შეხვედრაზე აღინიშნა „უორდროპის სტრატეგიული დიალოგის“ მნიშვნელობა, რომელიც რეგულარულ პლატფორმადაა ჩამოყალიბებული. ამ კუთხით ხაზი გაესვა მიმდინარე წელს, უორდროპის სტრატეგიული დიალოგის“ მერვე რაუნდის ფარგლებში, საქართველოს საგარეო საქმეთა მინისტრის ვიზიტის მნიშვნელობას გაერთიანებულ სამეფოში.

საქართველოს პირველი დიპლომატის თქმით, შეხვედრაზე ყურადღება ასევე გამახვილდა ეკონომიკური ურთიერთობების გაძლიერების და არსებული პოტენციალის სრულფასოვანი გამოყენების შესაძლებლობებზე; ხაზი გაესვა თავდაცვისა და უსაფრთხოების, ასევე ხალხთაშორისი ურთიერთობების სფეროებში წარმატებულ თანამშრომლობასაც.

მხარეებმა შეხვედრაზე განიხილეს საქართველოს ევროპული და ევროატლანტიკური ინტეგრაციის საკითხი. ხაზი გაესვა საქართველოს მიერ განხორციელებულ სამუშაოს და ამ მიმართულებით მიღწეულ პროგრესს.

როგორც ილია დარჩიაშვილმა აღნიშნა, ნატო-ში ინტეგრაციის გზაზე გაერთიანებული სამეფო საქართველოს გამორჩეული მხარდამჭერია. მან მადლობა გადაუხადა ბრიტანეთის მხარეს ნატო–საქართველოს არსებითი პაკეტის (SNGP) იმპლემენტაციაში შეტანილი მნიშვნელოვანი წვლილისთვის და მიესალმა გაერთიანებული სამეფოს, როგორც ნატო-ს საკონტაქტო საელჩოს როლს, რომელსაც ის რუმინეთთან ერთად ასრულებს. ორი ქვეყნის საგარეო საქმეთა მინისტრების შეხვედრაზე საუბარი ასევე შეეხო შავი ზღვის რეგიონის მზარდ მნიშვნელობას როგორც უსაფრთხოების, ასევე ეკონომიკური და ენერგეტიკული მიმართულებით;

ახალი რეგიონული კონტექსტის გათვალისწინებით, ყურადღება გამახვილდა საქართველოს განსაკუთრებულ როლზე ევროპის ენერგოუსაფრთხოების უზრუნველყოფის საქმეში და დაკავშირებადობის აქტუალურობაზე. ამასთან, აღინიშნა საქართველოს, როგორც სატრანზიტო და ლოგისტიკური რეგიონული ცენტრის მნიშვნელობა.

შეხვედრის ფარგლებში, განხილული იქნა რეგიონში არსებული უსაფრთხოების გარემო, რაც მკვეთრად დამძიმდა უკრაინის წინააღმდეგ რუსეთის სრულმასშტაბიანი სამხედრო აგრესიის შედეგად. აღინიშნა, რომ სწორედ საქართველო იყო პირველი ქვეყანა, რომელმაც საკუთარ თავზე გამოსცადა რუსეთის აგრესია და მისი თანმდევი შედეგები.

2023 წლის 16-17 მარტს, საქართველოს ოფიციალური ვიზიტით გაერთიანებული სამეფოს საგარეო, თანამეგობრობისა და განვითარების საქმეთა სახელმწიფო მდივანი ჯეიმს კლევერლი ეწვია.

ვიზიტის ფარგლებში, ჯეიმს კლევერლი საქართველოს მთავრობის მეთაურს, ირაკლი ღარიბაშვილს შეხვდება. ასევე, გაერთიანებული სამეფოს საგარეო უწყების ხელმძღვანელი ეწვევა საოკუპაციო ხაზს და ადგილზე გაეცნობა არსებულ ვითარებას.

საქართველოში ვიზიტის ფარგლებში, ჯეიმს კლევერლი დაესწრება ციფრული მმართველობის სააგენტოს მიერ კიბერუსაფრთხოებასთან დაკავშირებით ორგანიზებულ ღონისძიებას და შეხვედრას გამართავს სამოქალაქო საზოგადოების წარმომდგენლებთან.

აღსანიშნავია, რომ 2016 წლის შემდეგ, ეს გახლავთ გაერთიანებული სამეფოს საგარეო,თანამეგობრობის და განვითარების საქმეთა სახელმწიფო მდივნის პირველი ვიზიტი საქართველოში.