სახალხო დამცველის, ლევან იოსელიანის განცხადებით, ერთ-ერთ იზოლატორში დაკავებული 25-ვე ადამიანი მოინახულა. მისი თქმით, ყველაზე სერიოზული დაზიანებები ვიზუალურად გირჩი - მეტი თავისუფლების ლიდერს, ზურაბ ჯაფარიძეს აღენიშნება. ამის შესახებ მან ჟურნალისტებთან ისაუბრა.
"მოვინახულე ყველა დაკავებული, ვინც ამ იზოლატორში იმყოფება. დაკავებულია 25 ადამიანი, რომელიც აქ არის და ყველა მათგანთან მქონდა პირისპირ საუბარი და მოვუსმინე იმ გარემოებების შესახებ, რა პირობებშიც მოხდა მათი დაკავება. რამდენიმე მათგანს აღენიშნება დაზიანებები გარეგნული.
ამავე დროს, მოვინახულე, რა თქმა უნდა, ზურაბ ჯაფარიძე, რომელიც აქ იმყოფება, მას აღენიშნება გარეგნული დაზიანება. ყველამ განაცხადა, რომ ექიმთან გაიარეს კონსულტაცია და ექიმმა მოინახულა ისინი [...] დაზიანებები ყველაზე სერიოზული, რაც მე ვნახე, ვიზუალურად ზურაბ ჯაფარიძეს აღენიშნება", - განაცხადა იოსელიანმა.
შსს-ის განცხადებით, 7 მარტს, პარლამენტთან მიმდინარე აქციაზე 66 ადამიანი დააკავა.