პარტია "გირჩი - მეტი თავისუფლების" ოფისში ოპოზიციის ბრიფინგი გაიმართა. ოპოზიციონერების თქმით, პარტიის ლიდერს,ზურაბ ჯაფარიძეს, რომელიც გუშინ პოლიციამ დააკავა, თავის არეში აქვს დაზიანებები და დაუყოვნებლივ საჭიროებს ჰოსპიტალიზაციასა და სამედიცინო კვლევებს.
ცოტნე კობერიძე ამბობს, რომ ჯაფარიძის ფიზიკურ დაზიანებებს სახალხო დამცველის აპარატის წარმომადგენლებიც ადასტურებენ. მისივე თქმით, ზურაბ ჯაფარიძესთან იმყოფებიან და მისი მდგომარეობა გუშინდელთან შედარებით უკეთესია
"სტრატეგია აღმაშენებლის" წევრის, სერგო ჩიხლაძის თქმით, ზურა ჯაფარიძესთან ამ დრომდე არცერთი ექიმი არ შესულა.
ოპოზიციონერები მოუწოდებენ არასამთავრობო ორგანიზაციებს, სახალხო დამცველს, დიპლომატიურ კორპუსსა და საერთაშორისო ორგანიზაციებს, დაინტერესდნენ ზურა ჯაფარიძის მდგომარეობით.
"ჩვენ გვაქვს დადასტურებული ინფორმაცია, რომ მას აქვს მიყენებული დაზიანებები თავის არეში და ის დაუყოვნებლივ საჭიროებს ჰოსპიტალიზაციას, საჭიროებს სამედიცინო კვლევებს, რომლის საშუალებაც არ არის იქ, სადაც ახლა იმყოფება. მინდა მივმართო არასამთავრობო ორგანიზაციებს, სახალხო დამცველის აპარატს, დიპლომატიურ კორპუსსა და საერთაშორისო ორგანიზაციებს, დაინტერესდნენ ზურა ჯაფარიძის მდგომარეობით",- განაცხადა "დროას" წევრმა, გიგა ლემონჯავამ.
