შეუფერებელია საქართველოს რაიმე კონტექსტში ოკუპანტ ქვეყანასთან შედარება, როცა სხვა ქვეყნის წარმომადგენელი ნებისმიერ კონტექსტში რუსეთს ადარებს თქვენს სამშობლოს, თქვენ უნდა იყოთ პირველი, ვინც ამას წინ უნდა აღუდგეს, – ასე მიმართა საქართველოს პარლამენტის თავმჯდომარე შალვა პაპუაშვილმა ოპოზიციონერ დეპუტატს, „რესპუბლიკური პარტიის“ თავმჯდომარე ხათუნა სამნიძეს პარლამენტის ბიუროს სხდომაზე.
“თქვენ ახლა გაიმეორეთ რუსული, რუსული, რუსული. ეს არის ყველაზე დიდი პროპაგანდისტული ტყუილი, რომელიც ვრცელდება საზოგადოებაში. ეს არის პირდაპირ პროპაგანდის ყველაზე ელემენტარული ინსტრუმენტი, რაღაც თემის დისკუსიის დაბრენდვა, სტიგმატიზება მისი, როგორც რუსულის“, – აღნიშნა პაპუაშვილმა.
პაპუაშვილის თქმით, „შეუფერებელი ტყუილია, როდესაც საქართველოს შედარება ხდება რუსეთთან“.
„თქვენ, როგორც პარლამენტის წევრებს, თუკი ვინმე ამას ამბობს, პირველ ყოვლისა, თქვენ უნდა უშლიდეთ. საქართველოს რუსეთთან რაიმე სახით კონტექსტში დაყენება არის საქართველოს შეურაცხყოფა და ამას უნდა ხვდებოდეთ, როდესაც გეუბნებიან. აბსოლუტურად შეუფერებელი კონტექსტია და მეორე – პროპაგანდისტული ხაზი, ისტერია, რომლის დათესვაც თქვენ გინდათ. კანონპროექტზე გუშინ კომიტეტზეც არაერთხელ ითქვა, რომ ამის ისე წარმოჩენა, თითქოს კანონს ვიღებთ ან ასე შემდეგ, მიმდინარეობს პირველი მოსმენა, ასევე გაცხადებულია, რომ იქნება კონსულტაცია ვენეციის კომისიის დასკვნის შემდეგ, ვიცით, რომ ასევე ეუთო/ოდირშიც მიმდინარეობს განხილვა, ამისგან ისტერიის შექმნა, თითქოს ახლა რაღაცები ხდება, ეს არის საზოგადოებისთვის თვალში ნაცრის შეყრა.
პროპაგანდა აბსოლუტურად მიუღებელი და შუფერებელია. საქართველოს რაიმე კონტექსტში შედარება ოკუპანტ ქვეყანასთან არის შეუფერებელი. ვინც არ უნდა თქვას, განსაკუთრებით უცხო ქვეყნის წარმომადგენელი როცა ამას იტყვის, თქვენ უნდა იცავდეთ თქვენს ქვეყანას. როცა სხვა ქვეყნის წარმომადგენელი თქვენს სამშობლოს ადარებს რუსეთს, ნებისმიერ კონტექსტში, თქვენ უნდა იყოთ პირველი, ვინც ამას წინ უნდა აღუდგეს და დაიცვათ. როდესაც თქვენ ხართ ამაში ჩაბმული, ეს კიდევ უფრო მეტად სამარცხვინოა“, – განაცხადა შალვა პაპუაშვილმა.
