პოლონეთის პრეზიდენტმა ანჯეი დუდამ განაცხადა, რომ უკრაინის წინააღმდეგ რუსეთის აგრესიას აქვს ნეოკოლონიალური ხასიათი, მისი თქმით, რუსეთს უკრაინის ეკონომიკური ექსპლუატაცია სურს.
ამის შესახებ მან ყატარში გაეროს ნაკლებად განვითარებული ქვეყნების მე-5 კონფერენციაზე გენერალური დებატებისას განაცხადა.
დუდას თქმით, რუსებს სურთ დაიპყრონ და ექსპლუატაცია გაუწიონ მეზობლებს, რაც ისტორიული კოლონიალიზმის გაგრძელებაა. მისივე თქმით, პოლონეთიც მისი მსხვერპლი იყო წარსულში.
„იმპერია იტაცებს ადამიანებს, მათ შორის ბავშვებს და მათ რუსეთის სიღმეში აგზავნის. უკრაინელები ადასტურებენ, რომ რუსებმა გაიტაცეს 100 ათასზე მეტი ბავშვი. ვინც მის ნებას არ ემორჩილება - იმპერია მას კლავს. ნუთუ ეს ნაცნობი არ არის? განა არ მომხდარა ასეთი რამ ბევრი ქვეყნის ისტორიაში? მე ამას ღიად ვამბობ, რადგან წარსულში პოლონეთი იყო მეზობელი იმპერიის სასტიკი პოლიტიკის მსხვერპლი“, - განაცხადა პოლონეთის პრეზიდენტმა.
დუდამ ასევე განაცხადა, რომ ნაკლებად განვითარებული ქვეყნების მოსახლეობის მხარდაჭერა ევროკავშირის ერთ-ერთ პრიორიტეტად უნდა დარჩეს. მან აღნიშნა, რომ ეს ქვეყნები ასევე ძლიერ დაზარალდნენ უკრაინაზე რუსეთის თავდასხმის, მათ შორის კვების პროდუქტებზე ფასების ზრდის გამო.