საბერძნეთში, სარკინიგზო კატასტროფის შემდეგ საპროტეტსო აქციები დაიწყო, ათასობით სტუდენტი რამდენიმე ქალაქის ქუჩებში გამოვიდნენ. ათენში დემონტრაციები პოლიციასთან შეტაკებაში გადაიზარდა. ამის შესახებ Associated Press იუწყება.
ათენში სპეცრაზმელებმა პარლამენტთან პროტესტანტების წინააღმდეგ ცრემლსადენი გაზი და მანათობელი ხმოვანი ყუმბარები მას შემდეგ გამოიყენეს, რაც აქციის მონაწილეებმა სამართალდამცველებს "მოლოტოვის კოქტეილები" ესროლეს და ნაგვის ურნებს ცეცხლი წაუკიდეს.
მემარცხენეებისა და სტუდენტური ჯგუფების მიერ ორგანიზებული აქციების მონაწილეები აპროტესტებდნენ, სარკინიგზო მაგისტრალებზე უსაფრთხოების ზომების არარსებობას და ხელისუფლებას სწრაფი რეაგირებისკენ მოუწოდებდნენ.
ყველაზე დიდი აქცია ქალაქ ლარისში გაიმართა, სადაც კატასტროფა მოხდა.
საბერძნეთში 28 თებერვალს, სარკინიგზო კატასტროფას 57 ადამიანი ემსხვერპლა.
სამგზავრო მატარებელი ათენიდან თესალონიკში მიემგზავრებოდა, სატვირთო მატარებელი კი – თესალონიკიდან ლარისში. სამგზავრო მატარებელში 350-მდე ადამიანი იმყოფებოდა. შეჯახების შედეგად სამგზავრო მატარებლის ოთხი ვაგონი რელსებიდან გადავარდა და ერთს ცეცხლი გაუჩნდა. ადგილობრივი ხელისუფლების წარმომადგენელთა თქმით, ორი ვაგონი თითქმის მთლიანად განადგურდა.
პრემიერ-მინისტრ კირიაკოს მიცოტაკისის განაცხადებით, ინციდენტის გამომწვევ მიზეზად ადამიანური ფაქტორი სახელდება.
დაკავებულია სადგურის ხელმძღვანელი, რომელსაც არაგანზრახ მკვლელობის ბრალდება აქვს წაყენებული. ის ბრალეულობას უარყოფს და მომხდარს ტექნიკურ გაუმართაობით ხსნის.
მომხდარი ტრაგედიის შემდეგ თანამდებობიდან გადადგა ტრანსპორტის მინისტრი.