წავიკითხე პრეზიდენტის განცხადება, მას არ დაუსახელებია პოლიტიკური პარტია და შესაძლოა, გულისხმობდა „ნაციონალურ მოძრაობას“, სხვას თუ ვინმეს გულისხმობდა, რომელიმე ოპოზიციურ პარტიას, სიმართლე გითხრათ, არ ვიცი, – ამის შესახებ საპარლამენტო უმრავლესობის წევრმა, მიხეილ სარჯველაძემ განაცხადა.
მიხეილ სარჯველაძემ კომენტარი გააკეთა საქართველოს პრეზიდენტის, სალომე ზურაბიშვილის განცხადებაზე, სადაც მან თქვა: „ანტიკონსტიტუციურად უნდა გამოცხადდეს და აიკრძალოს ყველა იმ პარტიის საქმიანობა, რომელიც ეწინააღმდეგება კონსტიტუციის პრინციპებს, ქვეყნისა და მოსახლეობის არჩეულ გზას“.
მისივე თქმით, გაუჭირდება თქმა რომელ პარტიას გულისხმობდა პრეზიდენტი
კითხვაზე, ფიქრობთ, რომ ის განცხადება შეიძლება, ოპოზიციის მიმართ ყოფილიყო გაკეთებული, სარჯველაძემ აღნიშნა: „გამიჭირდება თქმა, არ უთქვამს, ვის გულისხმობდა და გაუგებარია, მაგრამ, თუ ფიქრობდა და ჩანაფიქრი ის ჰქონდა, რომ ეს კრიტიკული განცხადება ყოფილიყო ხელისუფლების მიმართ, მგონია, ობიექტურად არავითარი მიზეზი და საფუძველი პრეზიდენტს ამისთვის არ გააჩნია. ხელისუფლება და სახელისუფლებო პარტია მომხრე ვართ საკითხზე დისკუსიის, მსჯელობის, განხილვის და არა – აპრიორი გადაწყვეტილებების მიღების. როგორ შეიძლება, ამის საწინააღმდეგოდ ვინმეს რამე ჰქონდეს“, – განაცხადა სარჯველაძემ.