საუბარი როდესაც არის „ხალხის ძალის“ ამ ინიციატივაზე, კანონზე და ასე შემდეგ, საბოლოო ჯამში, ზრუნვის თუ წუხილის საკითხი არის მხოლოდ ის ნაწილი, რომელიც შეეხება დასახელებას, – ამის შესახებ საქართველოს პარლამენტის თავმჯდომარემ, შალვა პაპუაშვილმა ევროკავშირის წევრი ქვეყნების ელჩებთან შეხვედრის შემდეგ ჟურნალისტებს განუცხადა.
„ჩვენ ვართ დისკუსიის დასაწყისში. ეს არის გრძელვადიანი დისკუსია, რომელიც, თავის მხრივ, მიმდინარეობის პროცესში თან დაელოდება ვენეციის კომისიის დასკვნას. ამიტომ აქ არაფერი არ არის საჩქარო და არ არის საჭირო აჟიოტაჟი. წინ არის დრო და შეიძლება ამაზე დისკუსია. კიდევ ერთხელ მოვუწოდებ ყველა ორგანიზაციას, რომ გამჭვირვალობას პასუხისმგებლობით მოეკიდონ, თვითონ იყვნენ ინიციატორები და აქტიური იმ საკითხში, რომ შესთავაზონ საზოგადოებას გადაწყვეტები ამ გამჭვირვალობის თაობაზე“, – განაცხადა შალვა პაპუაშვილმა.
როგორც შალვა პაპუაშვილმა აღნიშნა, 12 რეკომენდაციის ფარგლებში, ევროკავშირის წევრი ქვეყნების ელჩებთან რამდენჯერმე გაიმართა შეხვედრები და აღნიშნა, რომ ეს უკვე რეგულარული ფორმატია.
„ეს არის რეგულარული ფორმატი. იცით, რომ 12 რეკომენდაციის ფარგლებში, რამდენჯერმე გვქონდა შეხვედრა ევროკავშირის წევრი ქვეყნების ელჩებთან. რეგულარულად, ორ თვეში ერთხელ მაინც ვიკრიბებით, ისევე როგორც გუშინ იყო არასამთავრობო ორგანიზაციებთან შეხვედრა. რაც შეეხება განცხადებებს, აქ ახალი არაფერი არ არის. ეს პოზიცია არა მხოლოდ ელჩმა, არამედ ევროკავშირის სხვადასხვა ინსტიტუციამაც დააფიქსირა ამ პროექტთან დაკავშირებით. აქ ერთი რამ არის, რაზეც შეხვედრაზეც ვსაუბრობდით. როდესაც ეხება საქმე წუხილს, წუხილები ეხება ფორმასა და სახელწოდებებს. თუკი ჩაეკითხებით, ამ საკითხში რა არის პრობლემური, არ მგონია, ვინმემ გითხრათ, რომ პრობლემა გამჭირვალობაა. სხვათა შორის, ყოველთვის არის საუბარი, რომ უნდა იყოს ბალანსი სხვადასხვა ინტერესს შორის და საქართველოს პარლამენტი ასე მოქმედებს, ჩვენი კონსტიტუციის, ადამიანის უფლებათა ევროპული კონვენციისა და ინსტრუმენტების საფუძველზე, რომელიც არის. ამიტომაც მივმართეთ ვენეციის კომისიას“, – განაცხადა შალვა პაპუაშვილმა.
„ხალხის ძალის“ მიერ ინიცირებულ კანონპროექტთან დაკავშირებით, პაველ ჰერჩინსკი და 27 ქვეყნის წარმომადგენლები საკანონმდებლო ორგანოში შალვა პაპუაშვილსა და საგარეო ურთიერთობათა კომიტეტის თავმჯდომარეს შეხვდნენ. შეხვედრა სამ საათს გაგრძელდა.
