ფრიდონ ინჯია არის ჩვეულებრივი პოლიტიკური მაიმუნი, რადგან თურმე უნდა გამოვიძიოთ საქართველოს მიერ 2008 წელს ჩადენილი დანაშაულები, ამის შესახებ „სტრატეგია აღმაშენებლის“ წევრიმა, პაატა მანჯგალაძემ განაცხადა.
მისი თქმით, 2008 წლის ომთან დაკავშირებული განცხადების შემდეგ, ფრიდონ ინჯია არანაირ პატივისცემას არ იმსახურებს.
პაატა მანჯგალაძემ კომენტარი გააკეთა „ევროპელი სოციალისტების“ თავმჯდომარის, ფრიდონ ინჯიას განცხადებაზე, რომელშიც ინჯია აღნიშნავს: „ჩვენ გავაგრძელებთ ხელმოწერების შეგროვებას, რათა პროკურატურამ გამოიძიოს 2008 წლის ომთან დაკავშირებით სააკაშვილის რეჟიმის მიერ ჩადენილი დანაშაულები და პარლამენტშიც შეიქმნას შესაბამისი საგამოძიებო კომისია“.
„ამ განცხადებების შემდეგ, ასაკის მიუხედავად, ფრიდონ ინჯია ჩემი მხრიდან არანაირ პატივისცემას არ იმსახურებს. ვინც საქართველოს ინტერესს ეწინააღმდეგება, პატივისცემას არ იმსახურებს. ფრიდონ ინჯია არის ჩვეულებრივი პოლიტიკური მაიმუნი, რადგან თურმე უნდა გამოვიძიოთ საქართველოს მიერ 2008 წელს ჩადენილი დანაშაულები. ეს ყველაფერი ჯერ ლევან მამალაძემ გაახმოვანა. უფრო ადრე ამაზე საუბრობდნენ პრორუსული ჯგუფები. შემდეგ ამ ჯგუფებს პარლამენტში ფრაქცია შეუქმნეს, ახლა „ხალხის ძალაც“ იწონებს ამას და „ქართული ოცნებაც“. ხალხო, რა მოგივიდათ? ჰააგასა და სტრასბურგში გამართლდა საქართველო, არანაირი ომის დანაშაული არ ჩაუდენიათ, საქართველოს რა დანაშაულის გამოძიებას აპირებთ, რუსები ხართ ღიად და არ გრცხვენიათ? ფრიდონ ინჯიას ოჯახის წევრები ხომ ჰყავს, ვინმემ მაინც უთხრას, ვიცი, შვილი ჰყავს, უთხრას – მამა ასეთ რამეს ნუ აკეთებ, ეს არის სირცხვილი. შენი ქვეყნის წინააღმდეგ ნაბიჯის გადადგმა სირცხვილია. ხომ შეიძლება, ვინმემ უთხრას, თუ თვითონ ვერ ხვდება“, – აღნიშნა პაატა მანჯგალაძემ.
