რატომ ჰგონიათ აკია ბარბაქაძის პარტნიორ პოლიტიკურ ლიდერებს თავის მართლება ის, რომ ეს გეგმა მათთან შეთანხმებული არ ყოფილა. როცა აქციას აანონსებ, ამ აქციაზე იღებ პასუხისმგებლობას, - ასე ეხმიანება სოციალურ ქსელში „ტაბულას“ დამფუძნებელი თამარ ჩერგოლეიშვილი პერმანენტულ აქციებთან დაკავშირებით სამხედრო ექსპერტის, აკია ბარბაქაძის გუშინდელ განცხადებას.
„პოლიტიკური სპექტრის უდიდეს უმრავლესობას უბრალოდ არ ესმის რას ნიშნავს და რამდენად მნიშვნელოვანია პოლიტიკური პასუხისმგებლობა. ეს არის კატასტროფა.
ეს განაპირობებს იმას, რომ არანაირი ანგარიშვალდებულება არ არსებობს ამომრჩეველთან. ეს კი, თავის მხრივ განაპირობებს იმ პარალიჩს, რაც პოლიტიკურ პროცესს სჭირს.
საქმე ეხება აქციის ერთერთი სპიკერის და ორგანიზატორის მიერ პერმანენტული აქციების გამოცხადებას.
მე არ ვიცი, რატომ ჰგონიათ აკია ბარბაქაძის პარტნიორ პოლიტიკურ ლიდერებს თავის მართლება ის, რომ ეს გეგმა მათთან შეთანხმებული არ ყოფილა.
დაუძინებელო მეგობრებო! თქვენ ერთად აიღეთ ამ აქციაზე პასუხისმგებლობა, მიუხედავად იმისა, რომ ჩვენ (ევროპულ საქართველოს) გულით გვსურდა რომ უკრაინელებისთვის მიგვეცა ინიციატივა - ეს ბევრად ბუნებრივი და მაკონსოლიდირებელი იქნებოდა, სასიამოვნოც.
ჩვენი სურვილის მიუხედავად, თქვენ, არ აცადეთ უკრაინელებს, შეუთანხმებლად გამოვარდით და დაანონსეთ აქცია ამავე სპიკერთან ერთად, რომელმაც ახალი და მორიგი ეროვნული მოძრაობაც დააანონსა.
როცა ხალხი ამაზე აბუნტდა, მაშინაც იძახდით, რომ ეს შეუთანხმებელია.
ახლა რაშია საქმე!
ასე არ შეიძლება! არსებობს ასეთი ფენომენი - პოლიტიკური პასუხისმგებლობა!
როცა აქციას აანონსებ, ამ აქციაზე იღებ პასუხისმგებლობას. პასუხისმგებლობას იღებ გზავნილებზეც და მოლოდინებზეც. თუ პასუხისმგებლობას ვერ იღებ და უბრალოდ, პოლიტიკურ ქულებს ეპოტინები - ხარ პოლიტიკური არარაობა.
ახლა თქვენი გემოვნების საკითხია რად გამოჩნდებით, უპასუხისმგებლო არარაობებად, თუ პერმანენტულ აქციებს წამოიწყებთ.
და კიდევ ერთი - ამიტომ ვარჩევთ პარტნიორებს ფრთხილად. თქვენთან ერთად პროცესზე პასუხისმგებლობის აღება შეუძლებელია და პასუხისმგებლობის და ანგარიშვალდებულების გარეშე პროცესი არ არსებობს.
ეს არაერთხელ დამტკიცდა“, - წერს ჩერგოლეიშვილი.
სამხედრო ექსპერტმა, აკია ბარბაქაძემ საქართველოს პარლამენტის შენობის წინ აქციაზე სიტყვით გამოსვლისას განაცხადა: „ორშაბათიდან ვიწყებთ პერმანენტულ აქციებს, უნდა ჩამოვაყალიბოთ საბჭო, შევიკრიბებით ყველა, „ნაციონალური მოძრაობა“, შალვა ნათელაშვილი და კიდევ ბევრი“.