ოპოზიცია ჩვენს კანონს რუსულს უწოდებს. მათი მიზანია, საზოგადოებას ყურში ხვდებოდეს, რომ ეს არის რუსული კანონი, რადგან ხვალ არის აქცია, – ამის შესახებ მოძრაობა „ხალხის ძალის“ წევრმა, მიხეილ ყაველაშვილმა განაცხადა.
ყაველაშვილის თქმით, მათი მოძრაობის რუსულ ძალად წარმოჩენა ხდება.
„მათი მიზანია, ეს კანონი რამენაირად ხვალინდელ დღესთან დააკავშირონ, რომ ხალხი გააღიზიანონ და ახალგაზრდები გამოიყვანონ – შეხედეთ, ხალხო, რუსულ კანონებს იღებენ, იმავე კანონს იღებენ, რასაც პუტინი და სამოქალაქო საზოგადოების განადგურება უნდათო. როგორ შეიძლება, დემოკრატიაზე, თავისუფლებასა და ადამიანის უფლებებზე ვსაუბრობდეთ და პარლამენტის წევრს კანონპროექტის ინიცირების უფლებას არ მაძლევდნენ? ჩვენ მიმართ სტიგმატიზაცია ხდება. ესენი რომ ხელისუფლებაში იყვნენ, როგორც იუნკერები დახვრიტეს, ისე დაგვხვრეტდნენ. არასამთავრობო ორგანიზაციებს რაიმე დაუშალეს? გამჭვირვალობა დემოკრატიის ნაწილია და მოქალაქეებს უფლება არ აქვთ, მათი დაფინანსება იცოდნენ? ორშაბათს საკომიტეტო მოსმენა დაიწყება და ყველას ექნება საშუალება, განხილვაში ჩაერთოს და საკუთარი ხედვა შემოგვთავაზონ. განხილვაშიც არ უნდათ მონაწილეობა და დაგვისახელონ, რომელი პუნქტია რუსული? დღეს არ არის, მაგრამ ხვალ გახდებაო. ამ ადამიანებთან დეპოლარიზაცია როგორ უნდა მოვახდინოთ. ამხელა ზეწოლა გვაქვს, რომ დეპუტატებმა კანონპროექტის ინიცირება ვერ განვახორციელოთ. ჩვენს საზოგადოებას „ატენიან“, რომ ეს დემოკრატია არ არის. პირდაპირ ჩვენი დამუნათება და რუსულ ძალად წარმოჩენა ხდება", - თქვა ყაველაშვილმა.