ისრაელელმა ბიჭუნამ, რომელიც ყოველთვის თურმე დიდი ინტერესით ეცნობა მსოფლიოში მიმდინარე მოვლენებს, თურქეთში მიწისძვრის შედეგად დაზარალებული თანატოლების დახმარება გადაწყვიტა.
8 წლის ბენ კარასომ მას შემდეგ, რაც მედიით შეიტყო მიწისძვრით დაზარალებულებისთვის „ისრაელის სახლის“ დახმარების შესახებ, ორგანიზაციას დაბადების დღეზე შეგროვილი 180 დოლარი ჩაურიცხა.
როგორც ისრაელის ნიჭიერთა სკოლის მოსწავლე ბენი ამბობს, რიცხვი 18 ებრაულში სიცოცხლის სიმბოლოა, ამიტომაც გადაწყვიტა მან 180 დოლარით დახმარება.
„ისრაელის სახლის“ ხელმძღვანელის, იციკ მოშეს თქმით, ისრაელის საზოგადოებაში დამკვიდრებული ტრადიციაა, რომ თაობები აღიზარდოს ჰუმანურ პრინციპებზე, ხოლო პატარა ბენის ამ ნაბიჯს მის თანატოლებში აუცილებლად ექნება გამოხმაურება. „ბედნიერებაა, როცა შენი სახელმწიფოს და საზოგადოების კვალდაკვალ, პატარებიც ებმებიან ჰუმანიტარულ აქციებში“, - ამბობს იციკ მოშე.
ბენი კარასოს შემოწირულობას „ისრაელის სახლი“ დღეს საქართველოში თურქეთის საელჩოს გადასცემს.