შეერთებული შტატების თავდაცვის მდივნის თანაშემწის მოადგილემ, ლორა კუპერმა დაადასტურა, რომ რუსეთმა თავად დაარღვია მის მიერ გამოცხადებული "ცეცხლის შეწყვეტის რეჟიმი".
"ჩვენ ვხედავთ ბრძოლას დღეს უკრაინაში, მიუხედავად იმისა, რომ ფორმალურად ჩვენ ცეცხლის შეწყვეტის ფანჯარაში ვართ", - თქვა მან.
კუპერმა ასევე აღნიშნა, რომ რუსეთის ჯარებს სჭირდებათ დასვენება და გადაიარაღება, თუმცა რუსეთის მიერ გამოცხადებული "ცეცხლის შეწყვეტა" ამისთვის საკმარისი არ არის.
"ეს არის პუტინის განცხადება, რომელსაც ჩვენ სკეპტიციზმით უნდა შევხედოთ. ეს არის იგივე ადამიანი, ვინც თქვა, რომ არ შეიჭრებოდა უკრაინაში", - თქვა მან.
მოგვიანებით კითხვის დასაზუსტებლად, ჟურნალისტმა მას ჰკითხა, შეუძლია თუ არა დაადასტუროს, რომ რუსეთმა დაარღვია ცეცხლის შეწყვეტის შეთანხმება, კუპერმა კი უპასუხა:
"მე შემიძლია დავადასტურო, რომ ბრძოლები მიმდინარეობს და რუსები ადგილზე იბრძვიან, ასე, რომ დიახ", - თქვა მან.
ცნობისთვის, 5 იანვარს, რუსეთის პრეზიდენტმა, ვლადიმერ პუტინმა ერთი დღით, 6-7 იანვარს ცეცხლის შეწყვეტის ბრძანება გასცა. 7 იანვარს რუსეთი შობას აღნიშნავს. "საშობაო ზავის" ინიციატივით მანამდე რუსეთის პატრიარქი კირილი გამოვიდა. უკრაინის პრეზიდენტის, ვოლოდიმირ ზელენსკის შეფასებით, რუსეთს სურს, რომ შობა განახლებული ძალებით ომის გასაგრძელებლად გამოიყენებს.
