გაეროს გენერალური მდივნის, ანტონიო გუტიერეშის განცხადებით, ის იმედოვნებს, რომ რუსეთ-უკრაინის ომი 2023 წელს დასრულდება.
"მე არ ვარ ოპტიმისტურად განწყობილი ეფექტური სამშვიდობო მოლაპარაკებების [უკრაინასა და რუსეთს შორის] შესაძლებლობაზე უახლოეს მომავალში. მე მაინც მჯერა, რომ სამხედრო დაპირისპირება გაგრძელდება. ვფიქრობ, ჯერ კიდევ უნდა დაველოდოთ, სანამ სერიოზული სამშვიდობო მოლაპარაკებები იქნება შესაძლებელი. მოკლევადიან პერსპექტივაში ეს შესაძლებელი არ მგონია", - თქვა გაეროს გენერალურმა მდივანმა.
ამავდროულად, გუტიერეში იმედოვნებს, რომ მშვიდობა უკრაინაში 2023 წელს იქნება მიღწეული. მისი თქმით, მსოფლიომ ყველაფერი უნდა გააკეთოს იმისთვის, რომ მშვიდობიანი გზით გადაწყდეს რუსეთ-უკრაინის საკითხი.
აშშ-ს სახელმწიფო მდივნის, ენტონი ბლინკენის განცხადებით, სახელმწიფოები კვლავ შეშფოთებული არიან, რომ რუსეთმა, შესაძლოა, გამოიყენოს დიპლომატიური მოლაპარაკებები უკრაინაში ომის დასასრულებლად, როგორც ხრიკი, ბრძოლის ველზე თავისი ტაქტიკური პოზიციის გასაუმჯობესებლად.