შიმშილობა დღეს "ნაციონალური მოძრაობის" კიდევ ერთმა დეპუტატმა, თემურ ჯანაშიამ დაიწყო. ის პარტიის სამ დეპუტატს შეუერთდა, რომლებმაც პროტესტის ამ ფორმას პარლამენტში გუშინ მიმართეს.
დეპუტატები მესამე პრეზიდენტის სამკურნალოდ საზღვარგარეთ გადაყვანას ითხოვენ.
"როცა მივიღებთ გარანტიას, რომ ეს ადამიანი არის კვალიფიციური ექიმების ხელში, ისეთ მდგომარეობაში, რომ პროგრესი აღინიშნება მისი ჯანმრთელობის, რეალური პროგრესი, მაგ შემთხვევაში, რა თქმა უნდა, შევწყვეტთ", - თქვა ჯანაშიამ.
„ნაციონალური მოძრაობის“ დეპუტატებმა, დავით კირკიტაძემ, ანა წითლიძემ და აბდულა ისმაილოვმა, მიხეილ სააკაშვილის საზღვარგარეთ მკურნალობის გადაყვანის მოთხოვნით, შიმშილობა 15 დეკემბერს გამოაცხადეს. დღეს მათ „ნაციონალური მოძრაობის“ კიდევ ერთი დეპუტატი თემურ ჯანაშია შეუერთდა. მოშიმშილეებს შალვა პაპუაშვილი შეხვდა.
