რუსეთმა შესაძლოა გადაწყვიტოს საქართველოსთან პირდაპირი ფრენების განახლება და მისი მოქალაქეებისთვის ვიზალიბერალიზაცია, - ამის შესახებ რუსეთის საგარეო საქმეთა სამინისტროს დსთ-ის ქვეყნების მეოთხე დეპარტამენტის დირექტორმა დენის გონჩარმა რუსულ პროპაგანდისტულ მედიასთან TASS-თან ისაუბრა.
„რაც შეეხება საქართველოს მოქალაქეებისთვის პირდაპირი ფრენების აღდგენისა და ვიზალიბერალიზაციის პერსპექტივებს, თუ ამისათვის აუცილებელი წინაპირობები ჩამოყალიბდება - თბილისში არსებული პირობები ცნობილია - ჩვენ არ გამოვრიცხავთ ამ საკითხზე გადაწყვეტილების მიღებას", - განაცხადა გონჩარმა.
მან ასევე აღნიშნა, რომ საქართველოს ეკონომიკური ზრდის პროგნოზი ამ წლისთვის ორნიშნა ციფრამდე გაიზარდა "ძირითადად ტურიზმიდან, ფულადი გზავნილებისა და რუსეთთან ვაჭრობის შთამბეჭდავი შემოსავლების წყალობით".
ცნობისთვის, რუსეთის პრეზიდენტის ვლადიმირ პუტინის განკარგულებით, რუსულ ავიაკომპანიებს 2019 წლის 8 ივლისიდან დროებით ეკრძალებათ საქართველოში საჰაერო ტრანსპორტის განხორციელება. ეს აკრძალვა საქართველოში 2019 წლის 20 ივნისის დუმის დეპუტატის, სერგეი გავრილოვის ჩამოსვლასა და ამის გამო გამართულ ანტისაოკუპაციო აქციებს მოჰყვა.
