ლიბერალებისა და დემოკრატების ალიანსი ევროპისთვის (ALDE) საქართველოს ხელისუფლებას და პრემიერს, ირაკლი ღარიბაშვილს მთავარი არხის დამფუძნებლის, ნიკა გვარამიას გათავისუფლებისკენ მოუწოდებს.
როგორც განცხადებაშია აღნიშნული, საქართველოს პირველი ნაბიჯი ევროპულ გზაზე არის ოპოზიციონერი ჟურნალისტის, ნიკა გვარამიას გათავისუფლება, რომლის მიმართ განაჩენი "ყალბი ბრალდებებით გამოიტანეს, რომლებიც დაგმეს ადამიანის უფლებათა დამოუკიდებელმა ორგანოებმა როგორც საქართველოში, ასევე მის ფარგლებს გარეთ.
პარტია ლიბერალებისა და დემოკრატების ალიანსი ევროპისთვის, წევრ პარტიებთან ერთად, ევროკავშირის გაფართოების ერთგულია. საქართველოს, უკრაინასა და მოლდოვას, დასავლეთ ბალკანეთთან ერთად, ევროპული მომავალი უნდა ჰქონდეთ. ამ პროცესით ჩვენი ევროპული საზოგადოება ძლიერდება. კარი გაიღო უკრაინისა და მოლდოვისთვის ევროკავშირის კანდიდატის სტატუსის მინიჭებით.
იმისათვის, რომ საქართველომ ამ ეტაპს მიაღწიოს, მნიშვნელოვანი რეფორმების გატარებაა საჭირო. კანონის უზენაესობის დაცვის, დამოუკიდებელი პრესისა და სიტყვის თავისუფლების უზრუნველყოფის დებულებები ყველაზე მეტად მნიშვნელოვანია, განსაკუთრებით ევროპელი ლიბერალებისთვის.
ჩვენ მჭიდროდ ვთანამშრომლობთ ALDE-ს წევრ პარტიებთან საქართველოში ქვეყნის ევროპული მომავლის უზრუნველსაყოფად. საქართველოს პირველი ნაბიჯი ევროპულ გზაზე არის ოპოზიციონერი ჟურნალისტის, ნიკა გვარამიას გათავისუფლება, რომლის მიმართ განაჩენი ყალბი ბრალდებებით გამოიტანეს, რომლებიც დაგმეს ადამიანის უფლებათა დამოუკიდებელმა ორგანოებმა როგორც საქართველოში, ასევე მის ფარგლებს გარეთ.
მართლსაჯულების პოლიტიზირება უნდა შეწყდეს!
საქართველოს მთავრობა და მმართველი პარტია ვალდებულნი არიან განახორციელონ 2021 წლის 19 აპრილის შეთანხმება, რომელიც ევროკავშირის შუამავლობით პოლიტიკური კრიზისის დასრულებას ეხება. ეს არის გზა ევროკავშირის კანდიდატობისკენ.
შემოუერთდით ჩვენს მოწოდებას და მოითხოვეთ ნიკა გვარამიას დაუყოვნებლივ გათავისუფლება! მოგიწოდებთ, მიმართოთ საქართველოს პრემიერმინისტრ ირაკლი ღარიბაშვილს და მოითხოვოთ ნიკა გვარამიას გათავისუფლება.
"გაათავისუფლეთ ნიკა გვარამია ახლავე!", "საქართველოს სჭირდება დამოუკიდებელი და თავისუფალი მედია", "საქართველო იმსახურებს ევროკავშირში გაწევრიანებას" - ამ სათაურებით შეტყობინებებს ელექტრონული ფოსტის მეშვეობით ევროპარლამენტარები საქართველოს პრემიერმინისტრ ირაკლი ღარიბაშვილს უგზავნიან.
მათ მიერ გავრცელებულ განცხადებაში ნათქვამია, რომ ისინი ნებისმიერ დაინტერესებულ პირს სამ შაბლონს სთავაზობენ, რომლებშიც საუბარი სწორედ ნიკა გვარამიას თავისუფლების, ზოგადად, მედიის თავისუფლებისა და საქართველოს ევროპული მომავლისა და ევროპის საჭიროების შესახებაა.
გთავაზობთ მეილის შაბლონებს, რომლებსაც ევროპარლამენტარები ავრცელებენ:
"1. სათაური: საქართველო იმსახურებს ევროკავშირში გაწევრიანებას!
საქართველოს პრემიერ-მინისტრს, ირაკლი ღარიბაშვილს,
მე მხარს ვუჭერ საქართველოს ევროკავშირში გაწევრიანებას. მაგრამ ეს პროცესი წინ ვერ წავა, თუ ქვეყანაში ფუნდამენტური თავისუფლებები არ იქნება დაცული. კანონის უზენაესობა უნდა იყოს დაცული. დემოკრატიულ ქვეყანაში ოპოზიციურ ჟურნალისტებს თავისუფლად საუბრის საშუალება უნდა მიეცეთ.
გთხოვთ, გაათავისუფლოთ ნიკა გვარამია და პატივი სცეთ 19 აპრილის შეთანხმებას. ევროკავშირში გაწევრიანება შეიძლება განხორციელდეს მხოლოდ იმ შემთხვევაში, თუ პატივს სცემთ იმ ფუნდამენტურ ღირებულებებს, რომლებზეც კავშირი დაფუძნებულია. ერთად, ჩვენ უფრო ძლიერები ვართ.
2. სათაური: გაათავისუფლეთ ნიკა გვარამია ახლავე!
საქართველოს პრემიერ-მინისტრს, ირაკლი ღარიბაშვილს,
საერთაშორისო საზოგადოებამ იცის და შეძრწუნებულია ნიკა გვარამიას ყალბი ბრალდებით დაპატიმრების გადაწყვეტილებით. დემოკრატიულ ქვეყანაში ასეთი რამ არ ხდება. გთხოვთ, დაუყოვნებლივ გაათავისუფლოთ ის და პატივი სცეთ თავისუფალ პრესას და სიტყვის თავისუფლებას. ეს საქართველოს დაეხმარება
ევროკავშირის კანდიდატის სტატუსის მიღებაში.
ბატონო პრემიერო, მე მჯერა, რომ საქართველოს ადგილი ევროკავშირშია. მაგრამ ოპოზიციური ჟურნალისტის დაპატიმრება არის ქცევა, რომელიც არღვევს იმ ფუნდამენტურ თავისუფლებებს, რომლებზეც ეს კავშირია დაფუძნებული.
3. სათაური: საქართველოს სჭირდება თავისუფალი და დამოუკიდებელი მედია!
საქართველოს პრემიერმინისტრს, ირაკლი ღარიბაშვილს,
კრიტიკულად განწყობილი ჟურნალისტის, ნიკა გვარამიას დაპატიმრება გამოხატავს თავისუფალი და დამოუკიდებელი პრესის პრინციპის აშკარა დარღვევას, რაც ფუნდამენტურია ევროკავშირის კანდიდატი ქვეყნისთვის და აყვავებული დემოკრატიისთვის. ჟურნალისტების დაშინება და გაჩუმება ასეთი ტაქტიკით არ შეიძლება.
გთხოვთ, გაათავისუფლოთ ნიკა გვარამია და შეწყვიტოთ ჟურნალისტების დაპატიმრება ყალბი ბრალდებით".
"მოგიწოდებთ, მიმართოთ საქართველოს პრემიერმინისტრს და მოსთხოვოთ ნიკა გვარამიას გათავისუფლება... ევროპის მოქალაქეებს შეუძლიათ აჩვენონ, რომ ქვეყნებს, სადაც სრული დემოკრატიაა, შეუძლიათ შემოუერთდნენ ჩვენს საზოგადოებას... უბრალოდ "დააკოპირეთ" და ჩასვით ეს ტექსტი მეილის შეტყობინების გრაფაში. შენ შეგიძლია მიწერო საქართველოს პრემიერ-მინისტრის ოფისს მითითებულ მეილზე: contact@garibashvili.ge" - წერია განცხადებაში, რომელსაც ხელს ALDE-ს პრეზიდენტი აწერს.