დღეს სააპელაციო სასამართლოში ნიკა გვარამიას საქმეზე დასკვნითი სხდომა გაიმართება. მოსამართლე დღეს მხარეების რეპლიკებს და ნიკა გვარამიას საბოლოო სიტყვას მოისმენს. სავარაუდოდ დღესვე გახდება ცნობილი როდის გამოაცხადებს მოსამართლე გადაწყვეტილებას.
დაცვის მხარეს სამართლიანი და დამოუკიდებელი გადაწყვეტილების იმედი სააპელაციო ინსტანციის მოსამართლისგან არ აქვს, რადგან მთავარი არხის გენერალური დირექტორის საქმე პოლიტიკურად მოტივირებულია და სავარაუდოდ ქართული ოცნების ხელისუფლება ყველა ბერკეტს გამოიყენებს მოსამართლის გადაწყვეტილებაზე გავლენის მოსახდენად.
"დღევანდელ სასამართლო სხდომაზე მხარეები წარვდგებით რეპლიკებით, ასევე მოვისმენთ საბოლოო სიტყვებს, მათ შორის ნიკა გვარამიას საბოლოო სიტყვას და ამით სააპელაციო სასამართლოში საქმის განხილვა დასრულდება.
იმდენად აშკარაა ამ საქმის სიყალბე და ის, რომ რეალურად არანაირი სამართლებრივი საფუძველი არ არსებობს ნიკა გვარამიას პატიმრობაში ყოფნის და მის მიმართ გამამტყუნებელი განაჩენის, რომ ცხადია, პოლიტიკური წნეხის არ არსებობის პირობებში, სასამართლო მიიღებდა გამამართლებელ განაჩენს, თუმცა არ გვაქვს იმის ილუზია, რომ პირველი ინსტანციის მსგავსად, სააპელაციო სასამართლოს არ მოუწევს პოლიტიკური წნეხის პირობებში გადაწყვეტილების მიღება", - თქვა დიტო საძაგლიშვილმა.
შეგახსენებთ, ნიკა გვარამიას საქალაქო სასამართლომ 3 წლითა და 6 თვით პატიმრობა 16 მაისს შეუფარდა. მას პროკურატურა ედავება ჯერ კიდევ "რუსთავი 2"-ის დირექტორობის დროს, სამაუწყებლო კომპანიის "კანონიერი ინტერესების საწინააღმდეგოდ უფლებამოსილების ბოროტად გამოყენებასა და მისი კუთვნილი დიდი ოდენობით თანხის სამსახურებრივი მდგომარეობით გამოყენებას".
ორგანიზაცია "საქართველოს დემოკრატიული ინიციატივის'' მიერ სასამართლოდან გამოთხოვილი ინფორმაციით დადგინდა, რომ 2017 წლიდან 2021 წლის ჩათვლით, ამ მუხლით პატიმრობა არავისთვის აქვთ მისჯილი.