სრულიად რუსეთის ისტორიულ-ლიტერატურული პრემიის "ალექსანდრე ნეველის" აღმასრულებელი დირექტორის მარინა გუსევასა და პრემიის ორგკომიტეტის წევრის ალექსანდრე ველიგონენკოსთვის თბილისში შემოსვლაზე უარის თქმის მიზეზები ჯერ კიდევ არ განუმარტავთ. ამის შესახებ "ჯი-ეიჩ-ენს" საქართველოს ხალხთა მსოფლიო კონგრესის თბილისის ფილიალის თავმჯდომარე ნანა ჭყოიძემ განუცხადა.
"ქალბატონმა მარინა გუსევამ და ბატონმა ალექსანდრე ველიგონენკომ უკვე მიმართეს რუსეთ-საქართველოს შორის შუამავალ, შვეიცარიის საელჩოს და მოითხოვეს განემარტათ, თუ რა მიზეზით ეთქვათ მათ უარი თბილისში შესვლაზე. როგორც ვიცი, საკონსულოსგან პასუხი ჯერ არ მიუღიათ, რადგან ასეთ შემთხვევაში, მას აუცილებლად შემატყობინებდნენ", - განაცხადა ჭყოიძემ და აქვე განმარტა, რომ შვეიცარიის საელჩოს კანონი იმის უფლებასაც აძლევს, გუსევა და ველიგონენკოს აღნიშნულის მიზეზი არ დაუსახელოს.
"ვფიქრობ, საელჩოსთვის მიმართვას აზრი არც ჰქონდა, რადგან მათი საქართველოში არშემოშვების მიზეზი ისეთაც ცნობილია - ეს ადამიანები დაკავშირებულნი არიან ალექსანდრე ებრალიძის სახელთან", - განმარტა მან.
შეგახსენებთ, რომ სრულიად რუსეთის ისტორიულ-ლიტერატურული პრემიის "ალექსანდრე ნეველის" აღმასრულებელ დირექტორი, მოსკოველი მარინა გუსევა და პრემიის ორგკომიტეტის წევრი ალექსანდრე ველიგონენკო თბილისში არ შემოეუშვეს. მათ 13 ნოემბერს, "საქართველოს ხალხთა მსოფლიო კონგრესის" თბილისის ფილიალის დამფუძნებელ ღონისძიებაში უნდა მიეღოთ მონაწილეობა.
აღსანიშნავია, რომ ღონისძიებაზე ქართველი პოლიტიკოსებიდან მხოლოდ ნინო ბურჯანაძე და ვალერი კვარაცხელია იყვნენ მიწვეულნი და როგორც "ჯი-ეიჩ-ენს" ნანა ჭყოიძემ განუმარტა, "ბურჯანაძე პირადი სიმპათიის, კვარაცხელია კი ალექსანდრე ებრალიძესთან მისი ურთიერთობის გამო მიიწვია".
"სხვა პოლიტიკოსების მოწვევა მიზანშეწონილად არ მივიჩნიე, რადგან კონგრესი პოლიტიკური ორგანიზაცია კი არა არასამთავრობო, არაკომერციული საზოგადოებრივი ორგანიზაციაა, რომელიც ჰუმანიტარული პროგრამების და პროექტების განხორციელებას ეწევა", - აცხადებს ჭყოიძე, რომლის მტკიცებითაც, ორგანიზაციას პოლიტიკური შეფერილობა სულაც არ გასდევს.
"ის, რომ ღონისძიებაზე მთელი დარბაზი ალექსანდრე ებრალიძის ბანერებით იყო მორთული არ ნიშნავს, რომ ჩვენს ორგანიზაციას პოლიტიკური შეფერილობა აქვს. ბანერებში ალოგიკური არაფერია - ალექსანდრე ებრალიძე ჩვენი კონგრესის პრეზიდენტია", - განუცხადა ჭყოიძემ "ჯი-ეიჩ-ენს".
აქვე უნდა აღინიშნოს, რომ რუსეთის ისტორიულ-ლიტერატურული პრემიის "ალექსანდრე ნეველის" ორგანიზატორებმა და ლაურეატებმა რადენიმე დღის წინ ქართულ საზოგადოებრიობას მიმართვა გაუგზავნეს სადაც აღნიშნეს, რომ მარინა გუსევასა და ალექსანდრე ველიგონენკოს თბილისში ვიზიტის მიზანი "დავით აღმაშენებლის სახელობის პრემიის" დაფუძნებაში მონაწილეობა იყო და მას არაფერი საერთო პოლიტიკურ პროცესებტან არ ქონდა.