ბევრი ტურისტი არის კარგი და ჩვენ ტურისტებს ეროვნების მიხედვით არ ვარჩევთ - ასე ეხმიანება ფრაქცია "ქართული ოცნების" თავმჯდომარე მამუკა მდინარაძე "საერთაშორისო გამჭვირვალობის" კვლევას, რომლის თანახმადაც საქართველოს რუსეთზე ეკონომიკური დამოკიდებულება იზრდება.
"რაც შეეხება [რუსეთთან] დამოკიდებულებას, არანაირი არსებითი ცვლილება არ არის და არც ტურისტი არ არის იმდენი, რომ საგანგაშო იყოს, თან ტურისტია. როდესაც ფეიკები ვრცელდება, რომ საქართველოს მოსახლეობის 10% არის რუსების სახით შემოსული, ჯერ ერთი 10% არა შემოსულია 7%-ია, ისიც ტურისტული მიზნით და უმრავლესობა გასულია და ბევრად ნაკლებია, ვიდრე წინა წლებში. რუსიც შემოდის ტურისტი, უკრაინელიც, ბელორუსიც, ყოფილი საბჭოთა ქვეყნებიდანაც და ევროპის ქვეყნებიდანაც და ეს არის ძალიან კარგი. ბევრი ტურისტი არის კარგი და ჩვენ ეროვნებით ტურისტებს არ ვარჩევთ, ეს დაიმახსოვროს ყველამ... ტურისტი, ეკონომიკა არის სხვა სფერო და ის სიბინძურე, რასაც აბრალებენ ამ ქვეყანას არის აბსოლუტურად სხვა რამე", - ამბობს მდინარაძე.
