აშშ-ის სახელმწიფო დეპარტამენტმა საინვესტიციო კლიმატის შესახებ 2022 წლის ანგარიში გამოაქვეყნა, სადაც საქართველოს საინვესტიოციო კლიმატია შეფასებული.
სახელმწიფო დეპარტამენტის ყოველწლიური ანგარიში საინვესტიციო კლიმატის შესახებ, მოიცავს 170 ქვეყანაში არსებული საინვესტიციო გარემოს შესახებ ინფორმაციას, რომელიც მომზადებულია შეერთებული შტატების ადგილობრივი საელჩოების ეკონომიკური ოფიცრების მიერ
სახელმწიფო დეპარტამენტის ანგარიშში შეფასებულია საქართველოს საინვესტიციო გარემო და ეკონომიკური პოლიტიკა დამოუკიდებლობის მოპოვებიდან დღემდე, ასევე მართლმსაჯულების სისტემა და კორუფციასთან ბრძოლის საკითხები.
"საქართველო, რომელიც მდებარეობს დასავლეთ აზიისა და აღმოსავლეთ ევროპის გზაჯვარედინზე, არის პატარა, მაგრამ ღია ბაზარი, რომელიც სარგებელს იღებს საერთაშორისო ვაჭრობიდან, ტურიზმიდან და ტრანსპორტიდან. მიუხედავად იმისა, რომ იგი მგრძნობიარეა გლობალური და რეგიონული შოკების მიმართ, 1991 წლიდან ქვეყანამ განახორციელა ფართო ეკონომიკური რეფორმები, რამაც შედარებით კარგად ფუნქციონირებადი და სტაბილური საბაზრო ეკონომიკა შექმნა", - ვკითხულობთ დოკუმენტში.
როგორც ანგარიშში ვკითხულობთ, კორონავირუსის პანდემიამ დარტყმა მიაყენა წარსულში მიღწეულ ეკონომიკურ შედეგებს.
"საქართველოს ეკონომიკა 2020 წელს 6%-ით შემცირდა, განსაკუთრებით მკვეთრი ზარალით ტურიზმის სექტორში. მიუხედავად იმისა, რომ საქართველომ წარმატებით გაართვა თავი „კოვიდ-19“-ის პანდემიის პირველ ტალღას, ინფიცირების მაჩვენებელი 2021 წლის მეორე ნახევარში გაიზარდა, რამაც აიძულა მთავრობა, მიეღო მთელი რიგი შეზღუდვები, რამაც უარყოფითი გავლენა მოახდინა ეკონომიკურ აქტივობაზე.
მიუხედავად ამისა, საქართველოს ეკონომიკა 2021 წელს აღდგა და აჩვენა ძლიერი ზრდა, 10.4%-ით მეტი, ვიდრე 2020 წელს. მიუხედავად იმისა, რომ მთავრობა და საერთაშორისო ფინანსური პარტნიორები ოპტიმისტურ პერსპექტივას პროგნოზირებდნენ 2022 წლისთვის, რუსეთ-უკრაინის ომის ეკონომიკურმა ზემოქმედებამ და რუსეთზე დაწესებულმა სანქციებმა დააზიანა ზრდის პერსპექტივები და ზრდის დაბალი მოლოდინი განაპირობა", - აღნიშნულია ანგარიშში.
სახელმწიფო დეპარტამენტის ანგარიშის თანახმად, მთლიანობაში, საქართველოში ბიზნესისა და ინვესტიციის პირობები კარგია და საქართველო გამოირჩევა რეგიონის ქვეყნებს შორის. თუმცა, მზარდი უნდობლობაა სასამართლო სექტორის შესაძლებლობის მიმართ, რომ კომერციულ დავებს განიხილავს დამოუკიდებლად ან დროული, კომპეტენტური გზით, რამდენადაც ბიზნესის დავების ნაწილი სასამართლო სისტემაში წლობით ჭიანურდება.
"სხვა კომპანიები უჩივიან მუნიციპალურ დონეზე გადაწყვეტილების მიღების არაეფექტურ პროცესებს, ინტელექტუალური საკუთრების უფლებების აღსრულებაში ხარვეზებს, არაეფექტურ ანტიმონოპოლიურ პოლიტიკას, ბრალდებებია პოლიტიკურ ჩარევაზე, კანონებისა და რეგულაციების შერჩევით აღსრულებაზე, მათ შორის ვაჭრობის შესახებ კანონებისა და საკუთრების უფლებებთან დაკავშირებული დავების გადაწყვეტის სირთულეებზე. საქართველოს მთავრობა აგრძელებს მუშაობას ამ საკითხების გადასაჭრელად და მიუხედავად დარჩენილი გამოწვევებისა, საქართველო რეგიონში მაღალ ადგილზეა, როგორც ბიზნესის კეთების კარგი ადგილი", - აღნიშნულია ანგარიშში.
ანგარიშში აღნიშნულია, რომ საქართველოსთვის გადაზიდვები და ლოჯისტიკა პრიორიტეტული სექტორებია და ცდილობს ისარგებლოს გაზრდილი ტვირთბრუნვის მოთხოვნით.
ანგარიშში ასევე საუბარია ანაკლიის პორტთან დაკავშირებით, რომლის მშენებლობა შეწყდა და მიუხედავად იმისა, რომ მთავრობა პორტის აშენების მზაობას გამოთქვამს, ტენდერი ჯერ კიდევ არ გამოცხადებულა.
"2016 წელს მთავრობამ გააფორმა ანაკლიაში ახალი პორტის მშენებლობის კონტრაქტი საერთაშორისო ინვესტორების ჯგუფთან, მათ შორის ამერიკულ კომპანიასთან. თუმცა 2020 წელს მთავრობამ ამ ჯგუფთან კონტრაქტი შეაჩერა, რასაც შედეგად მოჰყვა ინვესტორთან სამართლებრივი დავა. იმის მიუხედავად, რომ მთავრობა აცხადებს თავისი მზადყოფნის შესახებ ააშენოს ანაკლიის ღრმაწყლოვანი პორტის პროექტი, ტენდერი ჯერ კიდევ არ გამოცხადებულა. ამას გარდა, ფოთსა და ბათუმში ლოჯისტიკურმა და პორტის მმართველმა კომპანიებმა დაიწყეს ბათუმისა და ფოთის პორტების განვითარება და გაფართოება. 2020 წელს საქართველოს უდიდესი პორტის, შავი ზღვის ფოთის პორტის მეპატრონემ გამოაცხადა თავისი გეგმები, შექმნას ღრმაწყლოვანი პორტი. 2021 წელს ლოჯისტიკურმა კომპანიებმა დაასრულეს ბათუმის და ფოთის პორტში ორი ახალი ტერმინალის პროექტები", - აღნიშნულია ანგარიშში.
სახელმწიფო დეპარტამენტში ასევე საუბარია საქართველოს ფინანსური სექტორისა და რუსეთის წინააღმდეგ დაწესებული სანქციების თაობაზე.
ანგარიშის თანახმად, "საქართველოს ეროვნული ბანკი და ფინანსური ინსტიტუტები სრულად მოქმედებენ ამერიკის შეერთებული შტატებისა და სხვა ქვეყნების მიერ რუსეთის წინააღმდეგ დაწესებული ფინანსური სანქციების შესაბამისად".
"საერთაშორისო ფინანსურ სანქციებთან შესაბამისობა სისტემატურად მოწმდება ფინანსური ინსტიტუტების ადგილზე შემოწმების დროს“,- აღნიშნულია სახელმწიფო დეპარტამენტის ანგარიშში.
