აშშ-ის არმიის მდივანმა დენ დრისკოლმა პარასკევს, გვიან ღამით, ზელენსკისთან მოლაპარაკებებისა და თეთრი სახლიდან სატელეფონო ზარის შემდეგ, კიევში გამართულ შეხვედრაზე ნატო-ს წევრი ქვეყნების ელჩებს ინფორმაცია მიაწოდა. ამის შესახებ The Guardian იუწყება.
როგორც გამოცემა იუწყება, აშშ-ის ოფიციალურმა პირებმა ნატო-ელ მოკავშირეებს განუცხადეს, რომ პრეზიდენტ ვოლოდიმირ ზელენსკის სამშვიდობო შეთანხმებაზე უახლოეს დღეებში დათანხმებისკენ მოუწოდონ, რადგან, თუ კიევი მას ხელს არ მოაწერს, მომავალში გაცილებით უარესი შეთანხმების წინაშე აღმოჩნდება
„არცერთი შეთანხმება არ არის იდეალური, მაგრამ ის ადრე თუ გვიან უნდა დაიდოს“, - თქვა დრისკოლმა.
წყაროების ცნობით, შეხვედრაზე რამდენიმე ევროპელმა ელჩმა კითხვის ნიშნის ქვეშ დააყენა შეთანხმების შინაარსი და ის, თუ როგორ აწარმოა აშშ-მა რუსეთთან მოლაპარაკებები მოკავშირეების ინფორმირების გარეშე.
„ეს საშინელი შეხვედრა იყო. ეს იყო არგუმენტი - „თქვენ არ გაქვთ კოზირები“- თქვა წყარომ.
დრისკოლმა არ დააკონკრეტა, შეესაბამება თუ არა მაგიდასთან არსებული შეთანხმება პრესისთვის გამოქვეყნებულ 28-პუნქტიან გეგმას.
„ზოგი რამ მნიშვნელოვანია, ზოგი დეკორატიული და ჩვენ ყურადღება გავამახვილეთ იმაზე, რაც მნიშვნელოვანია. პრეზიდენტ ტრამპს ახლა მშვიდობა სურს. რაც უფრო მეტი მზარეულია სამზარეულოში, მით უფრო რთულია ამის გაკეთება“, - თქვა მან იქ მყოფი ერთ-ერთი წყაროს ცნობით.
შეხვედრას ასევე ესწრებოდა კიევში აშშ-ის დროებითი რწმუნებული ჯული დევისი, რომელმაც სხვა დიპლომატებს განუცხადა, რომ მიუხედავად იმისა, რომ შეთანხმების პირობები უკრაინისთვის მძიმეა, მას სხვა გზა არ აქვს, გარდა იმისა, რომ მიიღოს, წინააღმდეგ შემთხვევაში მომავალში უარესი პირობების წინაშე დადგებოდა.
„შეთანხმება არ უმჯობესდება, პირიქით, უარესდება“, - თქვა მან.
