სამგორის რაიონის გამგებელი, კახა სამხარაძე, რომელმაც ახლო წარსულში, აქცია "შინ ევროპისკენ" მონაწილეები შეურაცხმყოფელი სიტყვებით მოიხსენია, ირაკლი კობახიძეს მხარდაჭერას უცხადებს.
"ჩემი მხარდაჭერა პატრიოტ და უნიჭიერეს ახალგაზრდას, ირაკლი კობახიძეს. ვადასტურებ, მის მიმართ უზარმაზარ პატივისცემას და გვერდში დგომას! ზუსტად იმიტომ ებრძვიან მოღალატეები, რომ გრძნობენ მის ღირსეულობას და სიძლიერეს, მაგრამ შანსი 0%", - წერს სამხარაძე სოციალურ ქსელში.
შეგახსენებთ, გუშინ, 25 ივლისს, ირაკლი კობახიძე "მთავარი არხის" ჟურნალისტის შეკითხვამ გააღიზიანა. ჟურნალისტმა მას სთხოვა, შეეფასებინა დავით არახამიას განცხადება იმაზე, რომ "კობახიძის მამა "კაგებეშნიკია", რის შემდეგაც კობახიძემ ჟურნალისტს მიმართა: "ქალის სახე დაკარგე, პირი მოიწმინდე, სამარცხვინო, როგორც არახამია არ არის კაცი, ისე შენ არ ხარ ქალი".
კობახიძემ ჟურნალისტის შეურაცხყოფა დღესაც გააგრძელა: "ისე იყო გაბოროტებული, კითხვის დასმისას ყბა აუკანკალდა და პირდაპირი გაგებით, პირზე დუჟი მოადგა. ამის შემხედვარეს „რას დაგამსგავსათ აბელა სეთურმა“ იყო პირველი, რაც გაგახსენდებოდა", - დაწერა მან "ფეისბუქზე".