ევროკომისიამ განმარტა, რომ გარკვეული პირობების გათვალისწინებით, ის არ კრძალავს რუსული საქონლის ტრანზიტს სარკინიგზო გზით, კალინინგრადის მიმართულებით.
"ვადასტურებთ, რომ ევროკავშირის მიერ მიღებული ზომების შესაბამისად, სანქცირებული საქონლის ტრანზიტი ავტონტრანსპორტით დაუშვებელია. ასეთი აკრძალვები სარკინიგზო ტრანსპორტისთვის არ არსებობს, თუმცა ევროკავშირის წევრ ქვეყნებს უნდა შეეძლოთ ამ ტრანზიტის გაკონტროლება", - ნათქვამია ევროკომისიის განმარტებაში.
"ევროკავშირის ქვეყნებმა უნდა შეამოწმონ, რომ ტრანზიტის მოცულობა შეესაბამება ბოლო სამი წლის განმავლობაში დაფიქსირებულ საშუალო მაჩვენებლებს. ეს განსაკუთრებით ეხება ძირითად საქონელზე მოთხოვნას", - ხაზგასმულია დოკუმენტში.
დოკუმენტის თანახმად, ევროკავშირმა უნდა უზრუნველყოს, რომ ტრანზიტი არ იყოს გამოყენებული სანქციების გვერდის ავლით.
ამასთან, ევროკომისია აღნიშნავს, რომ "სანქცირებული სამხედრო ან ორმაგი დანიშნულების საქონლისა და ტექნოლოგიების ტრანზიტი სრულად აკრძალულია, ტრანსპორტირების მეთოდის მიუხედავად".
"დღევანდელი განმარტებების გამოქვეყნების მიზანია, დაზუსტდეს, რა წესები არსებობს და შევახსენოთ ევროკავშირის ქვეყნებს თავიანთი ვალდებულება, შეაჩერონ ევროკავშირის შემზღუდავი ზომების გვერდის ავლის ნებისმიერი მცდელობა. ამასთან დაკავშირებით, ევროკომისია ხაზს უსვამს კალინინგრადის ოლქსა და დანარჩენ რუსეთს შორის სავაჭრო ნაკადების მონიტორინგის მნიშვნელობას. ეს აუცილებელია იმისთვის, რომ სანქციების ქვეშ მყოფი საქონელი არ მოხვდეს ევროკავშირის საბაჟო ტერიტორიაზე", - ნათქვამია დოკუმენტში.
ევროკომისიის განმარტებას გამოეხმაურა რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა. მისი თქმით, რუსული მხარე კალინინგრადში ტრანზიტის შესახებ ევროკავშირის მიერ გამოქვეყნებულ მასალებს შეისწავლის და დეტალურ ინფორმაციას გაავრცელებს.
შეგახსენებთ, 17 ივნისს, ევროკავშირის სანქციების ფარგლებში, ლიეტუვამ შეზღუდა ფოლადისა და შავი ლითონების ტრანზიტი კალინინგრადის ოლქის მიმართულებით. 10 ივლისიდან ამ ჩამონათვალს ცემენტის, ალკოჰოლის და სხვა საქონლის იმპორტის აკრძალვა დაემატა.
