შეერთებული შტატების ადმინისტრაციას აქვს ინფორმაცია, რომ რუსეთმა ირანს მიმართა თხოვნით, მიაწოდოს მას ასეულობით უპილოტო საფრენი აპარატი, მათ შორის თავდასხმის შესაძლებლობებით. აღნიშნულის თაობაზე აშშ-ის ეროვნული უსაფრთხოების მრჩეველმა ჯეიკ სალივანმა 11 ივლისს განაცხადა.
"ჩვენს ხელთ არსებული ინფორმაცია მიუთითებს იმაზე, რომ ირანის მთავრობა ემზადება დაჩქარებული წესით მიაწოდოს რუსეთს რამდენიმე ასეული უპილოტო საფრენი აპარატი, მათ შორის ისეთები, რომელთაც თავდასხმის განხორციელება შეუძლიათ", - თქვა სალივანმა.
სალივანის თქმით, ჯერჯერობით უცნობია, უკვე მიაწოდა თუ არა დრონები ირანმა რუსეთს, თუმცა აშშ-ის ინფორმაციით, ირანი ასევე ემზადება საფრენი აპარატების გამოყენების მიზნით რუსი სამხედროების გასაწვრთნელად.
ამავდროულად, სააგენტო Associated Press-ი ყურადღებას ამახვილებს იმაზე, რომ თეთრმა სახლმა ამ ინფორმაციის გასაჯაროება პრეზიდენტ ჯო ბაიდენის ისრაელსა და საუდის არაბეთში გამგზავრებამდე ერთი დღით ადრე გადაწყვიტა.
"აშშ-ის განცხადება, რომ ისრაელისა და საუდის არაბეთის მთავარი რეგიონული მეტოქე ირანი რუსეთს შეიარაღები ეხმარება, განპირობებულია იმითაც, რომ ისრაელიც და საუდის არაბეთის, მათი შიდა ინტერესებიდან გამომდინარე არ უერთდებიან გლობალურ ძალისხმევას, რომელიც უკრაინაში შეჭრის გამო რუსეთის დასჯისკენაა მიმართული", - წერს AP.