დღეიდან, 1-ლი დეკემბრიდან, სახელმწიფო შესყიდვების სფეროში მიმდინარე რეფორმის შედეგად, სახელმწიფო ტენდერები მხოლოდ სახელმწიფო შესყიდვების ერთიანი ელექტრონული სისტემის მეშვეობით ჩატარდება.
პროექტის პრეზენტაცია სასტუმრო "ქორთიარდ მარიოტში" სახელმწიფო შესყიდვების სააგანეტოს თავმჯდომარემ ტატო ურჯუმელაშვილმა გააკეთა.
მისი თქმით, რეფორმის მიზანია სახელმწიფო შესყიდვების პროცედურების გამარტივება, ტენდერში მონაწილეობასთან დაკავშირებული ხარჯების მინიმიზაცია, სახელმწიფო სახსრების გამჭვირვალე ხარჯვის უზრუნვეყოფა, შესყიდვების პროცესში კონკურენციის გაზრდა, სატენდერო პროცედურებში სუბიექტური გადაწყვეტილელების მაქსიმალურად აღმოფხვრა.
სახელმწიფო შესყიდვის ყველა პროცედურა განხორციელდება ვებ-გვერდზე წწწ.პროცურემენტ.გოვ.გე, სადაც ტენდერებთან დაკავშირებული ნებისმიერი ინფორმაცია ხელმისაწვდომი იქნება, როგორც მიმწოდებლისთვის, ასევე ყველა დაინტერესებული პირისთვის.
რეფორმის შედეგად გაუქმდა სატენდერო მოსაკრებელი და 200 ლარის ნაცვლად ტენდერში მონაწილეობის საფასური 50 ლარი განისაზღვრა. სატენდერო წინადადების წარდგენისას სავალდებულო აღარა არის ყველა მონაწილის მიერ სხვადასვხვა ადმინისტრაციული ორგანოდან (საგადასახადო ორგანოები, საჯარო რეესტრის ეროვნული სააგენტო, სასამართლო და სხვ.) შესაბამისი ცნობების წარდგენა. აღნიშნული დოკუმენტის წარდგენის ვალდებულება ექნება მხოლოდ იმ პრეტენდენტს, რომელთანაც სახელმწიფო შესყიდვების ხელშეკრულება უნდა დაიდოს.
იმავდროულად ცნობილი ხდება, რომ იქმნება სახელმწიფო შესყიდვებთან დაკავშირებული დავების განსახილველი საბჭო, რომლის მეშვეობით მოხდება სამოქალაქო საზოგადოების პარიტეტული ჩართვა შესყიდვებთან დაკავშირებული დავების გადაწყვეტაში.
