საქართველოს ეკონომიკისა და მდგრადი განვითარების მინისტრ ვერა ქობალიას განცხადებით, საქართველოს საზღვაო სფეროში სიტუაციის გამოსწორების პროცესი აქედანვე უნდა დაიწყოს.
მისი თქმით, ევროკავშირის ქვეყნების მიერ ქართველი მეზღვაურების შავ სიაში შეყვანა ნათლად ასახავს იმ პრობლემებს, რაც საქართველოს საზღვაო ადმინისტრაციაში არსებობს.
"მნიშვნელოვანია, რომ სიტუაცია გამოსწორდეს და რაც გასაკეთებელია, გავაკეთოთ. სიტუაციის გამოსწორება ვერ მოხდება ერთ თვეში და ორ თვეში, მაგრამ უნდა დაიწყოს ახლა. პირველი ეტაპზე დაიწყება საკადრო ცვლილებები. ახალი კადრები უკვე შერჩეული გვყავს. აუცილებელია ვითანამშრომლოთ ევროკავშირთან. უნდა ჩამოვიყვანოთ ექსპერტები საზღვაო სფეროში და ერთად შევიმუშაოთ გეგმა სიტუაციის გამოსასწორებლად", - განაცხადა ქობალიამ ანაკლიაში მისი და მთავრობის წევრების პრეზიდენტთან შეხვედრისას.
საქართველოს პრეზიდენტის განკარგულებით, საზღვაო ადმინისტრაციის ყველა თანამშრომელი დაითხოვეს. დათხოვნის მიზეზი ევროკავშირის ქვეყნებში ქართველი მეზღვაურების შავ სიაში შეყვანა გახდა.
