23 ივნისს ბრიუსელში ევროკავშირის სამიტი გაიხსნა, რომელიც ორ დღეს გასტანს.
მოსალოდნელია, რომ ევროკავშირის წევრი ქვეყნების ლიდერები დადებითად გადაწყვეტენ უკრაინისა და მოლდოვის საკითხს ევროკავშირის წევრობის კანდიდატის სტატუსთან დაკავშირებით, ევროკომისიის რეკომენდაციის შესაბამისად.
"ისტორიული მოვლენები ვითარდება“, - განაცხადა ევროკომისიის პრეზიდენტმა ურსულა ფონ დერ ლაიენმა სამიტის დაწყების წინ.
როგორც მან აღნიშნა, საუბარია არა მხოლოდ რუსეთის აგრესიაზე უკრაინის წინააღმდეგ, არამედ რუსეთის შეჭრის შემდეგ უკრაინის, მოლდოვისა და საქართველოს მიერ ევროკავშირში გაწევრიანების შესახებ განცხადებებზე.
მისი თქმით, ევროპაში "ცვლილების ქარმა" კვლავ დაუბერა.
პარასკევს 4 თვე გავიდა უკრაინაში რუსეთის შეიარაღებული შეჭრის დაწყებიდან. ბრძოლა დიდი ინტენსივობით გრძელდება, განსაკუთრებით, ქვეყნის აღმოსავლეთში.
ბრიუსელიც და კიევიც აღიარებენ, რომ უკრაინისთვის კანდიდატის სტატუსის მინიჭების გადაწყვეტილება, უპირველეს ყოვლისა, არის ძლიერი მხარდაჭერის სიმბოლო რუსული აგრესიის ფონზე და რომ უკრაინის ევროკავშირში გაწევრიანების გზა გრძელი და რთული იქნება.
თუმცა, კიევი ხაზს უსვამს ამ ნაბიჯის მნიშვნელობას, რომელსაც უკრაინის პრეზიდენტმა ვოლოდიმირ ზელენსკიმ "ნაბიჯი სიბნელიდან სინათლისკენ" უწოდა.
როგორც ვარაუდობენ, უკრაინასა და მოლდოვას მიენიჭებათ კანდიდატის სტატუსი, მაგრამ მათთან წევრობაზე მოლაპარაკება დამოკიდებული იქნება კორუფციასთან ბრძოლასა და კანონის უზენაესობის გაძლიერებასთან დაკავშირებული რიგი პირობების შესრულებაზე.
მათი ევროკავშირში შესვლის სავარაუდო თარიღი ჯერ არ სახელდება, თეორიულადაც კი, პოლიტიკოსები ათწლიან ან კიდევ უფრო მეტ პერიოდზე საუბრობენ.
საქართველოსთან მიმართებაში, მოსალოდნელია, რომ ევროკავშირის ლიდერები აღიარებენ თბილისის ევროპულ პერსპექტივას, თუმცა ქვეყანა კანდიდატის სტატუსს მხოლოდ პირობების შესრულების შემდეგ მიიღებს.
მედიის ინფორმაციით, ევროკავშირის სამიტის ფარგლებში, ლიდერები რუსეთის წინააღმდეგ სანქციათა მე-7 პაკეტთან დაკავშირებითაც იმსჯელებენ.
