ევროპარლამენტში გამართულ დებატებზე, სადაც უკრაინისთვის, მოლდოვისა და საქართველოსთვის კანდიდატის სტატუსის მინიჭებასთან დაკავშირებულ საკითხებზე იმსჯელეს, თავისი მოსაზრება გამოთქვა საფრანგეთის ევროპულ საქმეთა მინისტრმა კლემან ბონმა.
საქართველოზე საუბრისას, ბონმა განაცხადა, რომ დასავლეთი თბილისისგან ევროპული ნაბიჯების გადადგმას მოელის, მათ შორის პოლიტიკური პატიმრების გათავისუფლებას.
"საჭირო იქნება იმ განსხვავების გათვალისწინება უკრაინის, საქართველოს და მოლდოვას შემთხვევაში, რომელიც ევროკომისიამ მოგვაწოდა მის რეკომენდაციებში; საქართველომ გამოამჟღავნა ინტერესი ევროპული ინტეგრაციის მიმართ და მისი ევროპული პერსპექტივის აღიარება უდავოდ აუცილებელია, თუმცა სიტუაცია [უკრაინისა და მოლდოვისგან] განსხვავებულია საქართველოს შემთხვევაში. არსებობს საქართველოს მხრიდან გარკვეული ჟესტების მოლოდინი, მათ შორის არის პოლიტიკური პატიმრების გათავისუფლება და სხვა ევროპული ღირებულებების შესაბამისი ქმედებები", - თქვა კლემანმ ბონმა "რადიო თავისუფლების" ცნობით.
შეგახსენებთ, უკრაინისთვის, საქართველოსა და მოლდოვისთვის კანდიდატის სტატუსის მინიჭების თაობაზე საბოლოო გადაწყვეტილებას ევროკავშირის წევრი ქვეყნების ლიდერები მიიღებენ სამიტზე, რომელიც ბრიუსელში 23-24 ივნისს გაიმართება.