ხვალ, 1-ელ დეკემბერს ხორცის პირველადი გადამამუშავებელი საწარმო "იბერმით-ჯორჯია" თბილისში მეორე მაღაზიას გახსნის. გახსნას, რომელიც ხვალ 11:00 საათზეა დაგეგმილი სოფლის მეურნეობის მინისტრი ბაკურ კვეზერელი და საკრებულოს წევრი, საბურთალოს რაიონის მაჟორიტარი დეპუტატი ზაზა სინაურიძე დაესწრებიან. ხორცის სპეციალიზირებული მაღაზია საბურთალოზე, ვაჟა-ფშაველას #37-ში იხსნება.
"იბერმით-ჯორჯიას" მაღაზიათა ქსელი "იბერულას" სახელით არის წარმოდგენილი. თბილისში პირველი მაღაზია 6 ნოემბერს ყაზბეგის გამზირზე, # 6-ში ილვე გაიხსნა.
შეგახსენებთ, რომ ოქტომბერში ხორცის ახლად გახსნილი პირველადი გადამამუშავებელი საწარმო საქართველოს პრეზიდენტმა დაათვალიერა. საწარმოში რუსეთის აგრესიის დროს დაზარალებული 100-მდე ადამიანი მუშაობს, სამომავლოდ კი კიდევ 300-მდე ადამიანის დასაქმება იგეგმება.
ქარხანა "იბერმით-ჯორჯია" ქართველ გლეხებს სიახლეს სთავაზობს: გლეხებს აღარ მოუწევთ რაიონში ჩასვლა პირუტყვის გასაყიდად. ქარხანას თავისი წარმომადგენლები ეყოლება, რომლებიც თავად შეიძენენ პირუტყვს საბაზრო ფასად.
მიხეილ სააკაშვილმა ქარხნის ხელმძღვანელობასთან საუბრისას აღნიშნა, რომ ხორცისა და ხორცპროდუქტების ხარისხი აუცილებლად უნდა ამაღლდეს, ქართული სამზარეულო უნდა განვითარდეს და გამრავალფეროვნდეს.
"იბერმით-ჯორჯია" ქართული ინვესტიციაა და მისი აშენება 10 მილიონი ლარი დაჯდა.
