დიდი ბრიტანეთის მთავრობამ ვიზები არ გასცა რუსეთის დელეგაციის წევრებზე, რომელთაც ეუთოს საპარლამენტო ასამბლეის ივლისის სესიაში მონაწილეობის მიღება სურდათ. ამის შესახებ რუსეთის ფედერაციის საბჭოს საგარეო საქმეთა კომიტეტის თავმჯდომარის მოადგილემ ვლადიმირ ჯაბაროვმა განაცხადა.
როგორც აღმოჩნდა, რუსეთის დელეგაციის ყველა წევრი, უკრაინაში გაჩაღებული ომის გამო, ბრიტანეთის მიერ სანქცირებულთა სიაშია, რაც მათ ქვეყნის ტერიტორიაზე შესვლას უკრძალავს.
ჯაბაროვის თქმით, ის სასწრაფოდ მოითხოვს, რომ ეუთოს საპარლამენტო ასამბლეის ხელმძღვანელობამ და რუსეთის საგარეო საქმეთა სამინისტრომ უზრუნველყოს "რუსეთის დელეგაციის ამ მეტად მნიშვნელოვან ღონისძიებაში მონაწილეობა".
"ჩვენ მივიღეთ უაღრესად აღმაშფოთებელი პასუხი ბრიტანეთის მთავრობისგან, რომ მათ არ ძალუძთ რუსეთის დელეგაციის წევრებისთვის ვიზების გაცემა რა მიზნითაც არ უნდა სურდეთ მათ ბრიტანეთში ვიზიტის განხორციელება", - თქვა ჯაბაროვმა.
ეუთოს საპარლამენტო ასამბლეის 29-ე ყოველწლიური სესია 2-6 ივლისს დიდ ბრიტანეთში, ბირმინგემში გაიმართება.
