„ეს არის ბეჭდის დასმა იმაზე, რომ „ქართულ ოცნებას“ ნატოში გაწევრიანების პოლიტიკურ საკითხზე თავად აქვს ხელი აღებული.“ - ასე ეხმაურება „ევროპული საქართველოს“ წევრი, გიორგი კანდელაკი, ირაკლი ღარიბაშვილის მიერ საქართველოს ნატოში გაწევრიანებაზე გაკეთებულ განცხადებას.
მისი თქმით, დეოკუპაცია არ არის ნატოში გაწევრიანების წინაპირობა, ეს არის ნატოს პრინციპული პოზიცია. ეს ძალიან მკაფიოდ აქვს ნათქვამი, როგორც ახლანდელ გენერალურ მდივანს, სტოლტენბერგს, ასევე წინა გენერალურ მდივნებსაც, რადგან იმის თქმა, რომ დეოკუპაცია ნატოში გაწევრიანების აუცილებელი პირობაა, ნიშნავს ოკუპაციის წახალისებას.
„ღარიბაშვილის დღევანდელი განცხადება არა უბრალოდ ოკუპაციის წახალისებაა, არამედ კონტექსტის გათვალისწინებით, ეს არის ბეჭდის დასმა იმაზე, რომ „ქართულ ოცნებას“ ნატოში გაწევრიანების პოლიტიკურ საკითხზე თავად აქვს ხელი აღებული. ნატოში გაწევრიანებას დღეიდან საქართველო ოფიციალურად აღარ ესწრაფვის, ეს არის ღარიბაშვილის თავზარდამცემი განცხადების შინაარსი და მნიშვნელობა.“ - განაცხადა გიორგი კანდელაკმა.
