ყაზახეთის ხელისუფლება სთავაზობს ყველა ქვეყენას, მათ შორის ბირთვულ ძალებს, შეიმუშავონ გეგმა 2045 წლისთვის ბირთვული იარაღის სრული უარყოფისთვის. ამის შესახებ ყაზახეთის საგარეო საქმეთა მინისტრი მუხტარ ტლეუბერდი 18 ივნისს გამოქვეყნებულ სტატიაში წერს.
"უკრაინის ტერიტორიაზე სამხედრო კონფლიქტი, ბირთვული იარაღის დაბრუნებაზე საუბარი და ბირთვული იარაღის გამოყენების ომხრივი მუქარა გვაიძულებს, როგორც არასდროს, ვიფიქროთ კაცობრიობის დაუცველობასა და ამ მომაკვდინებელი იარაღის აკრძალვისა და აღმოფხვრის გადაუდებელ აუცილებლობაზე", - წერს საგარეო საქმეთა მინისტრი.
მინისტრი თავის სტატიაში აღნიშნავს, რომ ყაზახეთს აქვს მორალური უფლება, გააკეთოს ასეთი მიმართვა, რადგან 1993 წელს ქვეყანამ ნებაყოფლობით თქვა უარი მსოფლიოს მეოთხე ბირთვული ძალის სტატუსზე, მოიშორა რა სსრკ-დან მემკვიდრეობით მიღებული ბირთვული სარაკეტო არსენალი.
ტლეუბერდი იხსენებს, რომ გაეროს გენერალურმა მდივანმა ანტონიო გუტერეშმა ბირთვული იარაღის გამოყენების შესაძლებლობას უწოდა დღეს უფრო რეალური, ვიდრე "ცივი ომის ყველაზე ბნელ დღეებში".
"2045 წლისთვის ბირთვულ იარაღზე უარის შესახებ შეთანხმების წინადადება, შესაძლოა, აისახოს ბირთვული იარაღის აკრძალვის შესახებ ხელშეკრულების მონაწილე სახელმწიფოების პირველი შეხვედრის საბოლოო დოკუმენტებში", - ამბობს ტლეუბერდი თავის სტატიში.
ხელშეკრულების მონაწილე სახელმწიფოთა შეხვედრა ვენაში 21-23 ივნისს გაიმართება.
