შეერთებული შტატების ლიდერობით, 26 ქვეყანა მონაწილეობას მიიღებს მასშტაბურ სამხედრო წვრთნებში, სახელწოდებით RIMPAC 2022, რომელიც წყნარ ოკეანეში, ჰავაის კუნძულებსა და სამხრეთ კალიფორნიის სიახლოვეს გაიმართება.
მონაწილეობას წვრთნებში, რომელიც 29 ივნისიდან დაიწყება და 4 აგვისტომდე გასტანს, 25 000 პერსონალი მიიღებს.
მრავალეროვნული სამხედრო-საზღვაო წვრთნები RIMPAC პირველად 1971 წელს გაიმართა. წელს ის 28-ედ ტარდება.
წლევანდელ წვრთნებში მონაწილეობას მიიღებენ 38 საზღვაო ხომალდი, 4 წყალქვეშა ნავი, 170-ზე მეტი თვითმფრინავი.
სამხედრო მანევრებში მონაწილეობას იღებენ ძალები 26 ქვეყნიდან, მათ შორის აშშ, ავსტრალია, დიდი ბრიტანეთი, გერმანია, ნიდერლანდები, კანადა, საფრანგეთი, ინდოეთი, ჩილე, ეკვადორი, ინდონეზია, დანია, ტონგა, ისრაელი, კოლუმბია, იაპონია, ბრუნეი, მალაიზია, მექსიკა, სამხრეთ კორეის რესპუბლიკა, სინგაპური, ახალი ზელანდია, პერუ, ფილიპინების რესპუბლიკა, შრი-ლანკა და ტაილანდი.
წვრთნებს უმასპინძლებს აშშ-ის წყნარი ოკეანის ფლოტის მეთაური.