პოლონური ავიაკომპანია "ლოტი" 2011 წლის იანვრიდან პოლონეთი-საქართველოს მიმართულებით კვირაში ოთხ რეის განახორციელებს, _ ამის შეახებ განცხადება ეკონომიკის მინისტრმა ვერა ქობალიამ სასტუმრო "რედისონში" მიმდინარე კოფნერეციაზე გააკეთა.
ქობალია პოლონეთში რამდენიმე თვის წინ იმყოფებოდა, სადაც შეხვედრები გამართა სამთავრობო და ბიზნესწრეების წარმომადგენლებთან.
მისი თქმით, მან დაპირება მიიღო, რომ 2011 წლის იანვრიდან კვირაში სამი რეისის ნაცვლად 4 რეისს განახორციელებს.
ქობალიამ აღნიშნა, რომ პოლონეთში ვიზიტის ფარგლებში ასევე შეხვდა პოლონეთის ინფრასტრუქტურის მინისტრს, რომელმაც მასთან საუბარში აღნიშნა, რომ საქართველოს ბაზრის ათვისებით სხვა მსხვილი ავიაკომპანიებიც არიან დაინტერესებული, რაზეც მინისტრის თქმით, ქართული მხარე მოლაპარაკებებს დაიწყებს.
შეგახსენებთ, რომ 26 ნოემბერს ვარშავაში ხელი მოეწერა შეთანხმებას საქართველოსა და პოლონეთს შორის საჰაერო მიმოსვლის შესახებ. დოკუმენტს ხელი მოაწერეს საქართველოს ეკონომიკისა და მდგრადი განვითარების მინისტრმა, ვერა ქობალიამ და პოლონეთის სამოქალაქო ავიაციის პრეზიდენტმა ჟეგოჟ კრუშინსკიმ.
აღნიშნული შეთანხმება წარმოადგენს ლეგალურ ბაზას ქართული და პოლონური ავიაკომპანიებისათვის, რათა მათ განახორციელონ საჰაერო მიმოსვლა ორ ქვეყანას შორის. ხელშეკრულება ორივე ქვეყნის ავიაკომპანიებს საშუალებას მისცემს, რეისები განახორციელონ წინასწარ დადგენილი კვოტების გარეშე. ამასთან, საქართველოსა და პოლონეთს შორის ფრენის რეჟიმის ლიბერალიზება, რის გარანტიასაც ხელმოწერილი დოკუმენტი იძლევა, საშუალებას მისცემს ავიაკომპანიებს, საკუთარი შეხედულებით განსაზღვრონ ფრენის სიხშირე და მომსახურების ტარიფი.
საქართველოს ეკონომიკისა და მდგრადი განვითარების მინისტრის ვერა ქობალიას განცხადებით, ეს შეთანხმება ქართულ და პოლონურ ავიაკომპანიებს საშუალებას მისცემს, საკუთარი შეხედულების მიხედვით განსაზღვრონ მომსახურების ტარიფები და რეისების სიხშირე. მისი თქმით, შეთანხმება არა მხოლოდ გაზრდის კონკურენციას საჰაერო ბაზარზე, არამედ ხელს შეუწყობს საქართველოსა და პოლონეთს შორის ეკონომიკური ურთიერთობების გაღრმავებას.
პოლონეთის სამოქალაქო ავიაციის პრეზიდენტის, ჟეგოჟ კრუშინსკის განცხადებით, შეთანხმება გააღრმავებს ორი ქვეყნის თანამშრომლობას სამოქალაქო ავიაციის სფეროში და იგი სრულად შეესაბამება საჰაერო ბაზრის თანამედროვე მოთხოვნებს.
ხელმოწერის ცერემონიალს ასევე დაესწრნენ პოლონური ავიაკომპანია "ლოტის" წარმომადგენლები. აღნიშნული ავიაგადამზიდავი უკვე ახორციელებს საჰაერო მიმოსვლას თბილისსა და ვარშავას შორის. მათი განცხადებით, "ლოტის" ადმინისტრაცია უახლოეს მომავალში აღნიშნული მიმართულებით რეისების სიხშირის გაზრდას გეგმავს.