საკრებულოს ფრაქცია "ქრისტიან-დემოკრატების" ლიდერ ინგა გრიგოლიას განცხადებით, მუნიციპალური ტრანსპორტის ტარიფის აწევით თბილისის საკრებულომ სამარცხვინო გადაწყვეტილება მიიღო.
"საკრებულომ სამარცხვინო გადაწყვეტილება მიიღო. ხელისუფლება ცდილობს, მოსახლეობას ფასი ყველაფერზე გაუზარდოს. მუნიციპალურ ტრანსპორტზე ტარიფის აწევა ჯერ კიდევ ერთი თვის წინ დაიწყო, როდესაც მერიამ ავტობუსები შეამცირა. რეალურად, მგზავრობის საფასური 90 %-ით გაიზარდა. ტარიფი გაძვირდა წყალზე და ბევრ რამეზე. თბილისის საკრებულომ კი დღეს სამარცხვინო გადაწყვეტილება მიიღო მეტროსა და ავტობუსზე ფასის გაძვირებასთან დაკავშირებით", - განაცხადა გრიგოლიამ საკრებულოს სხდომის დამთავრების შემდეგ.
შეგახსენებთ, რომ რამდენიმე წუთის წინ საკრებულომ დაამტკციცა დედაქალაქის მთავრობის მიერ შეთავაზებული ინიციატივა მუნიციპალური ტრანსპორტით მგზავრობის ტარიფის 10 თეთრით გაძვირებასთან დაკავშირებით. ინიციატივის მომხრე 30 დეპუტატი იყო, ხოლო წინააღმდეგი - 9.
